बेइजिङ । चीनले अमेरिकी बैङ्कमा राखिएको अफगानिस्तानी रकम अमेरिकाले फिर्ता गर्नुपर्नेमा बताएको छ ।
संयुक्त राष्ट्र सङ्घका लागि एक चिनियाँ कूटनीतिज्ञले अफगानिस्तानको रकम तत्काल फिर्ता गर्न आह्वानसमेत गरेका हुन् ।
अफगान केन्द्रीय बैङ्कसँग सम्बन्धित नौ अर्ब ५० करोड डलर बराबरको सम्पत्ति अमेरिकाले रोक्का गरेपछि चिनियाँ कूटनीतिज्ञले रकम फिर्ताका निम्ति आह्वान गर्नुभएको हो । सन् २०२१ को अगस्टमा अतिवादी समूह तालिवानले काबुल कब्जा गरेर सत्ता सम्हालेपछि अमेरिकाले अफगानिस्तानको रकम रोक्का गरेको हो ।
सुरक्षा परिषद्को बैठकलाई सम्बोधन गर्दै संयुक्त राष्ट्रका लागि चीनका उपस्थायी प्रतिनिधि गेङ स्वाङले अफगानिस्तानका महिला तथा बालबालिकाको अधिकार र हितको रक्षा गर्न तत्काल अफगानी रकम फिर्ता दिनुपर्ने बताउनुभयो ।
न्युयोर्कको एक अदालतले गत महिना गरेको आदेशलाई उद्धृत गर्दै उपप्रमुख गेङले अफगानी सम्पत्ति रोक्का गर्नु अनुचित भएको बताउनुभयो । अफगानिस्तानको केन्द्रीय बैङ्कले न्युयोर्कस्थित फेडरल रिजर्भ बैङ्कमा यसअघि जम्मा गरेको तीन अर्ब ५० करोड अमेरिकी डलर जफत गर्न नमिल्ने आदेशसहित दिएको थियो । दुई दसकअघि सेप्टेम्बर ११, २००१ मा न्यूयोर्कमा भएको आतङ्कवादी हमलाबाट पीडित परिवारको उक्त रकम जफत् गर्नुपर्ने माग अस्वीकार गरेको थियो ।
अमेरिकाको इतिहासमा भएको हालसम्मको सबैभन्दा त्रासदिपूर्ण आतङ्कवादी आक्रमणका दोषीबाट क्षतिपूर्ति भराउने अधिकार पीडित परिवारलाई भए पनि अफगानिस्तानको केन्द्रीय बैङ्कको रकम जफत् गर्ने अधिकार नभएको आदेशमा उल्लेख गरिएको थियो । आतङ्कवादी हमला अफगान जनता वा अफगानिस्तानले नगरेकाले तालिबानले नै जघन्य आक्रमणको क्षतिपूर्ति तिर्नुपर्ने फैसला सुनाइएको थियो ।
२२ वर्षअघि १९ जना आत्मघाती आक्रमणकारीले अपहरण गरेका चारओटा विमान न्यूयोर्कका ट्विन टावर, वासिङटन डिसीमा रहेको अमेरिकी रक्षा मन्त्रालयमा ठोक्काइएको थियो । उक्त हमलामा विमानमा रहेका यात्रीसहित झन्डै तीन हजार जनाको मृत्यु भएको थियो भने छ हजारभन्दा बढी घाइते भएका थिए । (रासस/सिन्ह्वा)
