काठमाडौं । सत्तारुढ दल नेकपा (माओवादी केन्द्र) सहित आठ राजनीतिक दल नेपाली कांग्रेसलाई राष्ट्रपति दिन सहमत भएका छन् ।
शुक्रबार प्रधानमन्त्री निवास बालुवाटारमा बसेको आठ दलको बैठकले नेपाली कांग्रेसका उम्मेदवारलाई राष्ट्रपतिमा अघि सार्ने निर्णय गरेको हो ।
नेकपा (एकीकृत समाजवादी) उपाध्यक्ष प्रकाश ज्वालाले बैठकबाट कांग्रेसलाई राष्ट्रपतिको उम्मेदवारमा समर्थन गर्ने निर्णय गरेको जानकारी दिए । उनले दलहरुले आ–आफ्नो दाबी पेश गरेपनि संसदको सबैभन्दा ठूलो दल कांग्रेसलाई राष्ट्रपति दिन आठ दल एक भएको बताए ।
ज्वालाले उपराष्ट्रपतिको उम्मेदवारबारे कुनै कुरा नभएको बताए । राष्ट्रपतिमा कांग्रेसलाई समर्थन गर्ने निर्णयसँगै सत्तागठबन्ध टुटेको छ । गत पुस १० गते एमालेसहित बनेको सातदलीय गठबन्धन दुई महिनामै टुटेको हो ।
बैठकमा प्रधानमन्त्री पुष्पकमल दाहाल प्रचण्डले आजैदेखि नयाँ राजनीतिक यात्रा सुरु भएको बताए ।
एकीकृत समाजवादी) का उपाध्यक्ष ज्वालाले आठ दलको सहमतिपछि प्रधानमन्त्रीले नयाँ राजनीतिक यात्रा सुरु भएको बताएको जानकारी दिए ।
‘संसदको ठूलो दल कांग्रेसलाई राष्ट्रपतिमा समर्थन गर्ने निर्णयका क्रममा प्रधानमन्त्रीले आजैदेखि नयाँ राजनीतिक यात्रा सुरु भएको घोषणा गर्नुभयो’ ज्वालाले बैठकपछि भने, ‘अब जनजीवीकाका मुद्दामा पनि हामी एक भएर अघि बढ्नेछौँ ।’
प्रधानमन्त्रीको यो घोषणासँगै सत्ता गठबन्धन टुटेको हो ।
प्रधानमन्त्रीको प्रस्तावमा राष्ट्रपति पद कांग्रेसलाई दिने सहमति भएपनि उम्मेदवारको बन्ने भन्ने विषयमा छलफल नभएको बैठकमा सहभागी राष्ट्रिय जनमोर्चाका महासचिव मनोज भट्टले जानकारी दिनुभयो ।
‘सबैभन्दा ठूलो पार्टीको हैसियतले राष्ट्रपतिमा कांग्रेसलाई समर्थन गरौँ भनेर प्रधानमन्त्रीले प्रस्ताव राख्नुभयो । त्यसलाई हामीले समर्थन गर्यौँ’ भट्टले भन्नुभयो, ‘को व्यक्ति बन्ने भन्नेबारे बैठकमा चर्चा भएन ।’
कांग्रेसबाट राष्ट्रपतिमा रामचन्द्र पौडेल र कृष्ण सिटौला दुई जनाको नाम चर्चामा छ । तर, बढी सम्भावना पौडेलको रहेको बताइन्छ ।
बैठकमा राष्ट्रिय जनमोर्चाको तर्फबाट अध्यक्ष चित्रबहादुर केसी, उपाध्यक्ष दुर्गा पौडेल र महासचिव भट्ट सहभागी हुनुभएको थियो ।
