इलाम बजार । लामो समयपछि पानी परेपछि इलामका किसान खुसी भएका छन् । २०७९ फागुन १० गते साँझदेखि रातिसम्म पानी परेकाले किसान खुसी भएका हुन् ।
असोजको पहिलो हप्तादेखि पानी नपरेकामा फागुन १० गते साँझदेखि रातिसम्म पानी परेको थियो । पानी परेपछि अलैँची र चिया किसानले ठुलो राहत महसुस गरेका छन् ।
आलु, तोरी तथा तरकारीलगायतका किसानले पनि लामो समयपछिको वर्षाका कारण राहत महसुस गरे । किसान सन्तोष राईले पानी परेपछि अब तरकारी खेतीमा चिस्यान हुन पुगेकाले ठुलो राहत मिलेको बताउनुभयो । उहाँले यो याममा पानी परेपछि फागुन अन्तिमदेखि नै चिया पलाउने र तोरी, गहुँलगायत बाली पनि सप्रिन्छ भन्नुभयो ।
लामो समयसम्म वर्षा नहुँदा जमिन सुक्खा भएकाले किसानले बारी खनजोत गर्नसमेत पाएका थिएनन् । अब भने सहज रूपमा खनजोत गर्न पाइने यहाँका किसानको भनाइ थियो । पानी नपरेपछि खोलानाला सुक्दै गएका थिए । खोला खोल्सामा पानी नहुँदा सिंचाइमा समेत समस्या हुँदै आएको थियो । अब भने केही समयका लागि पाइप लगाएर सिँचाइमा खट्नुनपर्ने किसानको भनाइ थियो ।
पानीले घाँससमेत छिटो पलाउने भएकाले यहाँका पशुपालक किसानसमेत उत्साहित भएका छन् । तराईबाट सुख्खा पराल ल्याउनुपर्ने बाध्यता रहेकामा अहिले परेको पानीले समयमै घाँससमेत पलाउने उनीहरूको अपेक्षा थियो । सुख्खा नलागे वैशाखदेखि बर्खे घाँस काट्न पाइने अनुमान गरिएको छ । (रासस)
