बिक्रम थापा, पोखरा ।
हिन्द प्रशान्त रणनीति आईपीएससँग सम्बन्धित एमसीसी परियोजना र नेपाली भूभागलाई समेटेर भारतद्वारा जारी नक्साको बिरोधमा पोखरामा नौ दलद्वारा संयुक्त बिरोध सभा सम्पन्न भएको छ। सभामा नौ दलका नेताहरुका साथ साथै कानुनविद् र बाम बुद्धिजिवीहरुले सम्बोधन गरेका थिए। सभालाई सम्बोधन गर्दै नेताहरूले राष्ट्रियताका निम्ति सबै नेपालीहरु एकजुट हुनुपर्नेमा जोड दिएका थिए ।

सभामा राष्ट्रिय जनमोर्चा गण्डकी प्रदेश अध्यक्ष शंकर बरालले एमसीसी कुनै पनि कोणबाट राष्ट्रिय हितमा नहुने ठोकुवा गर्दै यसलाई सदनबाट पास नगराउन आग्रह गर्नुभयो । नेता बरालले राष्ट्रिय हितका निम्ति सबै दल र जनता एक जुट हुन आह्वान गर्दै बिरोधमा सहभागी हुन जनतासित आग्रह गर्नु भयो ।

नेकपा (क्रान्तिकारी माओवादी) का गण्डकी प्रदेश सेक्रेटरी चन्द्रहरी सुवेदीले नेपालको कालापानी क्षेत्र सन् १९५४ देखी नै अतिक्रमणमा परेको बताउनु भयो । अहिले लिम्पियाधुरालाई समेटेर आफ्नो नक्सामा राखी प्रकाशन गरेकोप्रति भ्रत्सर्ना गर्दै उहाँले यथाशिघ्र नेपालले आफ्नो नक्सा प्रकाशित गर्नुपर्ने बताउनु भयो । त्यस्तै राष्ट्रघाँटी परियोजना एमसीसी खारेज गर्नुको विकल्प नरहेको उहाँको भनाई थियो ।

सभामा राष्ट्रिय जनमोर्चाका तर्फबाट विजयी गण्डकी प्रदेश सांसद कृष्ण थापाले एमसीसी र सीमा अतिक्रमणको विषय प्रदेश सभा सदनमा पनि गम्भीरताका साथ आवाज उठाएको बताउनु भयो । सभामा नेकपा (माओबादी केन्द्र) का प्रदेश सचिव भोजराज त्रीपाठी, नेकपाका प्रदेश सदस्य मनिस भट्टराई, नेकपा (माले)का केन्द्रीय सदस्य महेन्द्र शाह, बरिष्ठ अधिवक्ता तिलक पराजुली र राष्ट्रिय जागरण परिषदका पदम कार्कीले पनि सम्बोधन गर्नुभएको थियो ।

कार्यक्रममा संगम सांस्कृतिक मंचका कलाकारद्वारा देशभक्तिपुर्ण गीत प्रस्तुत गरेका थिए । बिरोध सभाको कार्यक्रम नेकपा (क्रान्तिकारी माओवादी) का प्रदेश सचिव केश बहादुर परियारको अध्यक्षता र राष्ट्रिय जनमोर्चा कास्कीका सचिव रबिमोहन ढकालको सञ्चालनमा सम्पन्न भएको थियो ।