जनकपुरधाम । एमसीसी र सीमा अतिक्रमण विरुद्ध नौ राजनीतिक दलले जनकपुरधाममा जनप्रदर्शनसहित विरोध सभा गरेका छन् । शुक्रबार देशका सात प्रदेशका प्रमुख स्थानसहित जनकपुरमा नौ दलले विरोध प्रदर्शन गरेका हुन् ।
रामजानकी मन्दिरबाट शुरु भएको विरोध जुलुस बजार परिक्रमा गरी चनक चोकमा पुगेर सभामा परिणत भएको थियो ।
सभालाई राष्ट्रिय जनमोर्चाका केन्द्रीय सदस्य तथा २ नम्बर प्रदेश इन्चार्ज चिन्तामणि पौडेलले सम्बोधन गर्दै मधेशका नेपाली राज्यसत्ताबाट र यहाँका जमिन्दारबाट दोहोरो पीडित बनेका बताउनुभयो ।
सीमा अतिक्रमण विरुद्ध मधेशी जनता सिमानामा जंगे पिलर बनेर बसेको उहाँले उल्लेख गर्नुभयो । मधेशवादी दलहरुले तराईका भूमिपुत्रहरुको हक हितमा कहिल्यै नबोल्ने भन्दै उहाँले भारतीयलाई नागरिकता दिलाउन उनीहरु लागिपरेको आरोप पनि लगाउनुभयो ।
कार्यक्रममा नेकपा .(मसाल)का प्रतिनिधि काजिलाल वाइवा, नेकपा (क्रान्तिकारी माओवादी) का प्युलोटब्युरो सदस्य हरिभक्त कँडेल, नेकपा (माले)का प्युलोट ब्युरो सदस्य दिनानाथ शर्मा र नेकपा (माओवादी केन्द्र) का प्रतिनिधि बबलु सिंहले सम्बोधन गर्नुभएको थियो । शभाको सञ्चालन नेपाल कम्युनिष्ट पार्टिका सहअध्यक्ष लोकनारायण सुवेदीले गर्नुभएको थियो ।
