काठमाडौँ । लोत्से बहुउद्देश्यीय प्रालिले फागुन १ गतेको घटनाको सन्दर्भमा आफ्ना कर्मचारीलाई झुटा मुद्दामा फसाउन लागिएको बताउँदै तत्काल रिहाइ गर्न माग गरेको छ ।

काठमाडौँ नयाँ बसपार्कस्थित लोत्से मलमै २०७९ फागुन ३ गते बुधबार आयोजित पत्रकार सम्मेलनमा प्रालिका अध्यक्ष दीपक कुँवरले यस्तो दाबी गरेका हुन् ।

‘फागुन १ गते प्रहरीले नै लोत्सेका कर्मचारीको गिरफ्तारी नभए आन्दोलन नरोकिने भयो भनेपछि हामीले हाम कर्मचारीहरू सुनिल कुँवर र पङ्कज मल्ललाई प्रहरीमा पठाएका हौँ’ उनले भने– ‘साँझसम्म छोडिदिन्छौँ भनेका थिए तर आजसम्म छोडिएको छैन ।’

उनले तत्कालै ती कर्मचारीलाई रिहाइ गर्न माग गरे ।

कार्यक्रममा प्रेसविज्ञप्ति वाचन गर्दै उनले फागुन १ गतेको सामान्य धकेलाधकेल मात्रै भएको तर मजदुर नेताहरूमाथि कुटपिट गरिएको प्रचार सत्य नभएको दाबी गर्नुभयो ।

‘मजदुर सङ्गठनले लोत्से मलमै सभा गर्न खोजेपछि हामीले त्यसप्रति असहमति जनायौँ’ उनले भने– ‘यो स्थान सभा गर्ने होइन, त्यसो गर्दा यातायात व्यवस्था जाम हुन्छ बरु अन्त कतै गरौँ, त्यसका लागि आवश्यक सहयोग गर्न हामी तयार छौँ भनेका थियौँ ।’

कुँवर भने– ‘त्यसपछि पनि मजदुर नेताहरूले नमानेपछि मजदुर नेता र लोत्सेका कर्मचारीमाझ सामान्य धकेलाधेलको अवस्था सिर्जना भएको हो ।’

अध्यक्ष कुँवरले मजदुर नेताहरूमाथि आरोप लगाउँदै भने– ‘नजिकै पेट्रोल पम्प छ । केही जत्था आगजनी गर्ने मुडमा थियो । हाम्रा कर्मचारीले संयमता नअपनाएको भए यहाँ आगजनी भएर ठुलो मानवीय क्षति हुने थियो । त्यसलाई हामीले रोकेका छौँ ।’

उनले मजदुर सङ्गठनको दिनभरिको प्रदर्शनपछि लोत्से मलभित्रका तीनओटा पसलमा तोडफोड भएको र लगभग ७ करोडजतिका मोबाइल चोरी भएको बताउनुभयो ।

‘पसल सञ्चालक अर्जुन चालिसेको तीनओटा पसलमा तोडफोड र चोरी भएको छ’ उनले भने– ‘त्यसबाट करिब सात करोडजतिको नोक्सानी भएको छ ।’

उनले त्यसको क्षतिपूर्ति भराइदिन सरकार र प्रशासनसँग माग गरे ।

कुँवरका अनुसार मलभित्र करिब आठ सय व्यवसायी, छ सय कर्मचारी छन् भने मलभित्र दैनिक ३० हजार ग्राहकको आवत्जावत् हुन्छ ।

पत्रकार सम्मेलनमा कुँवरले फागुन २ गतेको वार्तामा आफूहरूलाई नबोलाइएकोमा असन्तुष्टि पोखे ।

‘यदि बसपार्कभित्र हाम्रो लगानी गैरकानुनी छ भने तत्कालै बन्द गरियोस्’ उनले भने– ‘होइन भने हाम्रो लगानी सुरक्षित गरियोस् ।’

उनले फागुन १ गतेपछि आफूहरू सुरक्षामाथि प्रश्न उठेको पनि दाबी गरे ।