काठमाडौं । भारतीय विदेश सचिव विनयमोहन क्वात्रा विभिन्न राजनीतिक दलका नेताहरूसँग भेटवार्ता गरेर स्वदेश फर्किएका छन् । राष्ट्रपति निर्वाचनको पूर्वसन्ध्यामा नेपाल आएका क्वात्राले गरेको राजनीतिक भेटवार्तालाई अर्थपूर्ण मानिएको छ।
क्वात्राले सत्ता र विपक्षीदेखि मधेशवादी दलका नेताहरुलाई भेटेका हुन् ।
क्वात्राले सोमबार राष्ट्रपति विद्यादेवी भण्डारी, प्रधानमन्त्री पुष्पकमल दाहाल प्रचण्ड र परराष्ट्रमन्त्री विमला राईसँग भेटेका थिए।
सोमबार कांग्रेस सभापति शेरबहादुर देउवासँग भेटवार्ता गरेका क्वात्राले मंगलबार कांग्रेसका अर्का नेता बालकृष्ण खाणसँग एक्लै भेटेका छन्। भेटमा उनले राष्ट्रपति निर्वाचनबारे चासो राखेका थिए।
सोमबार नै क्वात्राले एमाले अध्यक्ष तथा पूर्वप्रधानमन्त्री केपी ओलीसँग पनि भेटेका थिए। क्वात्रालाई भेटेको भोलिपल्ट अध्यक्ष ओलीले एक सार्वजनिक कार्यक्रममा बोल्दै अहिलेको सत्ता गठबन्धन फेरबदल हुनसक्ने आशंका व्यक्त गरेका छन्। उनले सरकार ढाल्न देशीविदेशी तत्व लागेको बताएका छन्।
नेपालमा रहँदा उनले एकीकृत समाजवादीका अध्यक्ष माधवकुमार नेपाल, सत्तारुढ जनमत पार्टीका अध्यक्ष सीके राउत, कांग्रेसका नेता बालकृष्ण खाँणदेखि लोकतान्त्रिक समाजवादी पार्टीका अध्यक्ष महन्थ ठाकुरसँग भेटे।
परराष्ट्र सचिव भरतराज पौड्यालको निम्तोमा नेपाल आएका भारतीय विदेशसचिव क्वात्राले उपप्रधानमन्त्रीत्रय विष्णु पौडेल (अर्थमन्त्री), नारायणकाजी श्रेष्ठ (भौतिक पूर्वाधार) र राजेन्द्र लिङदेन (उर्जा) सँग भिन्दाभिन्दै भेटे।
राजनीतिक भेटवार्ताअघि उनले परराष्ट्र सचिव पौड्यालसँग द्विपक्षीय बैठक गरेका थिए। त्यस अवसरमा सचिव पौड्यालले कालापानी, लिम्पियाधुरा लगायत स्थानमा रहेका सीमा समस्याबारे कुरा उठाएका थिए।
बैठकपछि परराष्ट्र मन्त्रालयले जारी गरेको विज्ञप्तिमा सीमाका विषयमा स्थापित संयन्त्रका माध्यमबाट टुंग्याउन बाँकी सीमासम्बन्धी कामलाई पूर्णता दिनेबारे छलफल भएको उल्लेख गरिएको छ।
भेटवार्ता सकेर मंगलबार क्वात्रा फर्केका छन्।मंगलबार नै क्वात्राले बंगलादेश भ्रमण सुरु गरिसकेका छन्।
