गणेश अधिकारी, पोखरा ।
राष्ट्रिय जनमोर्चा कास्कीले पोखराको पृथ्वीचोकमा संघीयता खारेजीको माग गर्दै विरोध सभा सम्पन्न गरेको छ । सभागृहदेखि निस्केको जुलुश नाराबाजीसहित पृथ्वीचोकमा पुगि विरोध सभामा परिणत भएको थियो ।
विरोभ सभालाई सम्बोधन गर्दै राजमोका केन्द्रीय सदस्य तथा गण्डकी प्रदेश अध्यक्ष शंकर बरालले २०६२/०६३ सालको जनआन्दोलनमा संघीयताको नारा कसले लगायो ? भनी प्रश्न गर्नुभयो । नेपाली जनताले विगत ७० वर्षदेखि संघर्ष गरेर प्राप्त गरेको गणतान्त्रिक आन्दोलनमा संघीयताको माग नभएको बताउनु भयो ।
उहाँले भारतीय साम्राज्यवाद, अमेरिकी साम्राज्यवाद र युरोपियन युनियनको इशारामा जबर्जस्ती संघीयता लादिएको भन्दै त्यसको खारेजीको लागि सिंगो देश आन्दोलित हुनुपर्ने बताउनु भयो । नेता बरालले देशले आर्थिक दृस्ठिकोणले पनि ८ वटा सरकार र संसद धान्न नसक्ने कुरा स्पस्ट पार्नु भयो ।
उहाँले अमेरिकाले नेपालमा सिधा रवि लामिछानेको नेतृत्वमा राष्ट्रिय स्वतन्त्र पार्टी नामक दल खोलेर जनतामा रहेको चरम असन्तुष्टिको फाइदा उठाउन सफल भएको पनि बताउनु भयो ।
राप्रपाले आफ्नो प्रतिगामी उद्देश्यहरु राजतन्त्रसहित हिन्दु राज्य स्थापनाको लागि कहिले काहीं जनताको सेन्टिमेन्ट क्याच गर्न संघीयताको विरोध गर्ने गरेको नेता बरालले आरोप लगाउनु भयो ।
कार्यक्रममा नेकपा (मसाल) का पूर्वप्रवक्ता चन्द्रबहादुर केसी र अखिल (छैठौं) का केन्द्रीय उपाध्यक्ष गणेश अधिकारीले पनि सम्बोधन गर्नुभएको विरोध सभाको सञ्चालन राजमो कास्कीका अध्यक्ष रविमोहन ढकालले गर्नु भएको थियो ।
राजमोले ‘गणतन्त्र, धर्म निरपेक्षता र राष्ट्रिय स्वाधिनताको रक्षा गरौँ, संघीयता खारेज गरौँ’ भन्ने नारासहित देशैभर विभिन्न कार्यक्रम गरिरहेको छ ।
