काठमाडौं । नागरिक उन्मुक्ति पार्टीले सुदूरपश्चिम प्रदेशका मुख्यमन्त्री राजेन्द्र सिंह रावललाई विश्वासको मत नदिने निर्णय गरेको छ। आफ्नो माग सम्बोधन नभएकोले मुख्यमन्त्री रावललाई विश्वास मत नदिने सो दलले निर्णय गरेको हो ।
मंगलबार काठमाडौंमा बसेको पार्टीको बैठकले सुदूरपश्चिम सरकारलाई विश्वासको मत नदिने निर्णय गरेको अध्यक्ष रञ्जिता श्रेष्ठले जानकारी दिइन् ।
मुख्यमन्त्री रावलले यही माघ २६ गते प्रदेश सभाबाट विश्वासको मत लिँदैछन् । सुदूरपश्चिममा निर्णायक रहेको नागरिक उन्मुक्तिले विश्वासको मत नदिए सरकार ढल्छ ।
अध्यक्ष रञ्जिताले मंगलबार बिहान पार्टीका संरक्षक रेशम चौधरीसँग डिल्ली बजार जेलमा डेढ घण्टा लामो वार्ता गरेकी थिइन् । उनले प्रदेश सांसदहरुसँगको बैठकबाट एमाले नेतृत्वको सरकारलाई विश्वासको मत नदिने टुंगो लगाएकी हुन्।
गत माघ २७ गते नियुक्त सुदूरपश्चिमका मुख्यमन्त्री रावलले बुधवार प्रदेश सभाबाट विश्वासको मत लिने कार्यक्रम छ। यस्तोमा नागरिक उन्मुक्तिले नदिने निर्णय गर्दा रावल नेतृत्वको सरकार एक महिना नपुग्दै ढल्नेछ।
माओवादी केन्द्रका ११, एमालेका १० , नागरिक उन्मुक्तिका ७ र राप्रपाका १ गरी २९ सांसदको समर्थनमा एमाले संसदीय दलका नेता रावल २७ पुसमा मुख्यमन्त्री नियुक्त भएका थिए।
हालसम्म एमालेबाट मुख्यमन्त्रीसहित एक र माओवादीका एक मन्त्री मात्रै नियुक्त भएका छन्।
