काठमाडौं । ‘चौथो प्रधान सेनापति छात्रा तेक्वान्दो प्रतियोगिता–२०७९’ प्रतियोगितामा आयोजक टिम श्री विजेश्वरी ज्ञान मन्दिर सैनिक महाविद्यालय प्रथम भएको छ।
उपत्यका भित्र र बाहिरका विभिन्न जिल्लाका विद्यालय तथा डोजाङका खेलाडीहरूको सहभागिता रहेको जम्मा ३२ वटा टिमहरूमध्ये ५ स्वर्ण, ४ रजत र ३ कास्य पदक प्राप्त गरी आयोजक टिम च्याम्पिएन भएको हो।
यस्तै, ३ स्वर्ण, २ रजत र १ कास्य पदक प्राप्त गरी लैनचौर तेक्वान्दो डोजाङ टिम द्वितीय भएको छ भने ३ स्वर्ण र १ कास्य पदक प्राप्त गरी विश्व निकेतन स्कुल, त्रिपुरेश्वर टिम तृतीय हुन सफल भयो ।
विजेश्वरी ज्ञान मन्दिर सैनिक महाविद्यालयकी छात्रा दीपिका गुरुङ्ग जुनियर तर्फको उत्कृष्ट खेलाडी र विश्व निकेतन स्कुल, त्रिपुरेश्वरकी मनिषा तामाङ्ग सिनियर तर्फको उत्कृष्ट खेलाडी घोषित भए ।
प्रतियोगितामा बूढानीलकण्ठको बालुवाखानीस्थित फेरिल्याण्ड स्कुलकी छात्रा कृपा खपाङ्गीले काश्य पदक प्राप्त गरिन्। आयोजक ‘बी’ का खेलाडीलाई हराउँदै कृपा क्वाटरफाइनल प्रवेश गरेकी थिइन्।
पहिलो पटक यसखाले प्रतियोगितामा सहभागी भएकी कृपाले प्रशस्त अनुभव बटुल्ने मौका पाएको प्रशिक्षक दीपक दुलालले बताउनुभयो । भविष्यमा कृपाले राम्रो गर्न सक्ने सम्भावना रहेको प्रशिक्षक दुलालको आकलन छ ।
कार्यक्रममा प्रधान सेनापति प्रभुराम शर्माले महाविद्यालयको वार्षिक मुखपत्र ‘आशाकिरण’ को नवौं अङ्क विमोचन समेत गर्नुभयो ।
