काठमाडौं । काठमाडौंको पुरानो बानेश्वरमा बाबु छोरी मृत अवस्थामा भेटिएका छन् । रामेछाप घर भएका ४२ वर्षीय किशोर भण्डारी र उनकी ७ वर्षीया छोरी मृत भेटिएका हुन् ।
बुबा किशोर झुण्डिएको अवस्थामा फेला परेका थिए भने छोरीको घाँटी रेटिएको अवस्थामा शनिबार साँझ ६ बजे शव भेटिएको हो । त्यसैले उनले छोरीको हत्यापछि आत्महत्या गरेको हुनसक्ने आशंका गरिएको प्रहरीले जनाएको छ । छोरी शारीरिकरुपमा अशक्त थिइन् ।
घटनास्थलमा प्रहरीले सुसाइड नोट समेत फेला परेको छ । त्यसमा आर्थिक समस्या लगायत विविध विषय उल्लेख गरिएको प्रहरीको भनाइ छ । किशोरले फार्मेन्सी सञ्चालन गर्दै आएका थिए ।
घरमा चार जनाको परिवार बस्दै आएको भएपनि शनिबार अरु दुई जना बाहिर थिए ।
भण्डारीकी श्रीमती शनिबार ६ महिनाको छोरो लिएर पेप्सिकोलास्थित आफन्तकोमा गएकी थिइन्। उनी दिउँसो फर्केर आउँदा डेराका ढोका लगाइएको थियो।
भित्रैबाट बन्द भएपछि छिमेकीको सहयोगमा श्रीमतीले ढोका फोडेकी थिइन्।
अहिले प्रहरीले घटनास्थलमा पुगेर अनुसन्धान गरिरहेको छ।
