जित क्षेत्री, बागलुङ बजार ।
रक्तिम सांस्कृतिक अभियान ढोरपाटन नगरपालिकाको प्रथम नगर सम्मेलन बुर्तिबाङमा २०७९ माघ २१ गते शनिबार सम्पन्न भएको छ ।
केन्द्रीय सचिव तथा जिल्ला अध्यक्ष सहबिन अर्गेजाको प्रमुख आतिथ्यमा सम्मेलन सम्पन्न भएको हो ।
प्रमुख अतिथि अर्गेजाले द्वीप प्रज्ज्वलन गरी कार्यक्रमको उद्घाटन गर्नुभएको थियो । कार्यक्रममा बोल्दै उहाँले राष्ट्र«, जनता र क्रान्तिको लागि रक्तिम सांस्कृतिक अभियानले गीत र नृत्यमार्फत प्रस्तुत गर्दै आएको बताउनुभयो ।
२०४३ चैत २६ गते स्थापना भएको यस सङ्गठनले धेरै किसिमका आरोह–अवरोह तथा समस्यालाई समाधान गर्दै आफ्नो यात्रालाई अगाडि बढाएको उहाँको भनाइ थियो ।
‘वैचारिक र सङ्गठनात्मक रूपले सही दिशामा अगाडि बढाउन पहिले यसको बारेमा स्पष्ट हुन जरुरी हुन्छ’ उहाँले भन्नुभयो– ‘कतिपय मानिसहरू वैचारिक स्पष्टता नहुँदा अन्योलनमा रहेका छन् र यसमा अनुशासनको पनि निकै जरुरी रहन्छ ।’
कार्यक्रममा राष्ट्रिय जनमोर्चाका केन्द्रीय सदस्य गौरिश्वर पाण्डेले मन्तव्य राख्दै देशमा घटेका घटना र पीडालाई रक्तिमले गीत र नृत्यमार्फत प्रस्तुत गर्दै आएको बताउनुभयो ।
कथित ठुला दलले सङ्घीयतालाई हाबी बनाएको र आफूले वर्षौदेखि त्यसको विरोध गरिरहेको उहाँको भनाइ थियो । सङ्घीयताको खारेजी र गणतन्त्रलाई संस्थागत गर्न, देश र समाजलाई सुन्दर बनाउन रक्तिम सांस्कृतिक अभियानको महत्त्वपूर्ण भूमिका रहेको उहाँले बताउनुभयो ।
राजमो ढोरपाटन नगर अध्यक्ष तथा जिल्ला सदस्य दीपक थापाले रक्तिमले पार्टीलाई सङ्गठित क्षेत्रबाट सहयोग गरिरहेको बताउनुभयो । प्रतिगामी शक्तिहरूले संस्कृतिको विरुद्ध खिचातानी गरिरहेको र साम्राज्यवादी शक्तिलाई देशमा प्रवेश गराई निरन्तर आक्रमण गरेको आरोप लगाउनुभयो ।
कार्यक्रममा रक्तिमका कलाकारले जनवादी गीतसङ्गितको माध्यमबाट नृत्य प्रस्तुत गर्नुभएको थियो भने साविक खुङ्गा गाविसका पुरानो वामपन्थी नेता टकबहादुर अर्गेजालाई दोसल्ला ओढाएर सम्मान गरिएको थियो ।
कार्यक्रममा अखिल (छैठौँ) का केन्द्रीय सदस्य विमल पाण्डे, अखिल नेपाल बुद्धिजीवी सङ्घका केन्द्रीय सदस्य धनबहादुर कुँवर, जातीय समता समाजका केन्द्रीय सदस्य तथा जिल्ला अध्यक्ष नरबहादुर सुनार, अखिल नेपाल शिक्षक सङ्घका जिल्ला उपाध्यक्ष दुर्गाबहादुर भण्डारीले शुभकामना मन्तव्य व्यक्त गर्नुभएको थियो ।
सो अवसरमा राजमो जिल्ला सदस्य धनबहादुर अदै, अखिल नेपाल महिला सङ्घकी जिल्ला सदस्य पवित्राकुमारी छन्त्याल, अखिल नेपाल शिक्षक सङ्घका जिल्ला सदस्य टीकाबहादुर पुनलगायत जनप्रतिनिधि, पत्रकारको उपस्थिति रहेको थियो ।
सम्मेलनले झकप्रसाद श्रेष्ठ अध्यक्ष रहनुभएको ११ सदस्यीय पालिका समिति गठन गरेको छ । समितिको उपाध्यक्षमा अविन महत, कोषाध्यक्षमा सुधा घर्ती, सचिवमा रामबहादुर अर्गेजा तथा सदस्यहरूमा सावित्रा दर्जी, रुनमाया बुढा, केशव सिर्पाली, पुरन कुँवर र सविना कुँवर रहुनुभएको छ । सदस्यको दुई स्थान हाललाई रिक्त राखिएको छ ।
सम्मेलन रक्तिम ढोरपाटन नगर अध्यक्ष झकप्रसाद श्रेष्ठको अधयक्षता, रक्तिम नगर उपाध्यक्ष अविन महतको स्वागत र कुलबहादुर छन्त्यालको सञ्चालनमा सम्पन्न भएको थियो ।
