काठमाडौं । निवर्तमान गृहमन्त्री रवि लामिछानेले पुनः सोही मन्त्रालय नपाए सरकार छाड्ने चेतावनी दिएका छन् । मंगलबार बिहान प्रधानमन्त्री पुष्पकमल दाहाल प्रचण्डलाई भेटेर लामिछानेले आफ्नो पार्टीको भागमा परेको गृहमा पुनः नियुक्त गर्न आग्रह गरेका हुन्।
जवाफमा प्रधानमन्त्रीले गठबन्धनभित्र सल्लाह गर्छु भनेपछि रविले मंगलबार बेलुकीसम्मको अल्टिमेटम दिएको उनको सचिवालयले जनाएको छ ।
राष्ट्रिय स्वतन्त्र पार्टीले रविलाई नै पुनः उपप्रधानसहित गृहमन्त्री बनाउने अडान लिएको छ । उनलाई गैरसांसद मन्त्रीको रुपमा पुनः गृहमन्त्री बनाउने सो दलले जोड गरिरहेको छ ।
नागरिकता विवादमा गत शुक्रबार सर्वोच्च अदालतले आदेश दिएपछि उनी मन्त्री, सांसद र सभापति पदबाट बाहिरिएका थिए। लगत्तै आइतबार नागरिकता लिएका लामिछाने पार्टी सभापतिको जिम्मेवारीमा फर्किसकेका छन्।
सत्तारुढ गठबन्धनभित्र एमाले अध्यक्ष केपी शर्मा ओलीले गृह मन्त्रालयमा पुनः रविलाई नै नियुक्त गर्नुपर्ने अडानमा छन् भने माओवादी गृह आफैँले राख्ने पक्षमा छ ।
