काठमाडौं । जुम्लाको तातोपानी–३ तिलाकोटका तिलकबहादुर कार्की ‘हिमाल’ को साउदी अरबमा निधन भएको छ । ४० वर्षीय तिलकको पुस २७ गते सुतेकै अवस्थामा ज्यान गएको हो ।
गत वर्ष साउदी गएका उनी फलाम कारखानामा काम गर्थे । उनका आफन्त बखत कार्कीसँग एउटै कम्पनीका काम गर्ने र सँगै बस्ने गरेका तिलकको ह्रदयाघातका कारण निधन भएको अनुमान गरिएको छ ।
माओवादी लडाकुका पूर्वसेक्सन कमान्डर ‘हिमाल’ २४ प्रतिशत ब्याजमा ऋण लिएर गत वर्ष माघ ९ गते साउदी गएका थिए
। गोलीको छर्रा बोकेर साउदी गएका लडाकु कमान्डर एक वर्ष पनि नपुग्दै कफिनमा फर्किए ।
तिलकका बाबुआमा, पत्नी, दुई छोरा र एक छोरी छन् ।
पुस २७ गते निधन भएका तिलकको पार्थिव शरीर मंगलबार सात नेपाली श्रमिकको शवसहित त्रिभुवन विमानस्थलमा आइपुगेको हो । विमानस्थलमा शव बुझ्न आएकी तिलककी श्रीमती लक्ष्मी र १७ वर्षीया छोरा पारस निकै भावविह्वल देखिन्थे ।
पहिलो पटक काठमाडौं आएका उनीहरुका लागि साउदीबाट शव कसरी झिकाउने भन्ने ठूलो समस्या परेको बताउँछन् ।
जुम्लाबाट निर्वाचित सांसद ज्ञानेन्द्र शाहीसँग सम्पर्क गर्दा उनले बेवास्ता गरेको तिलकका छोरा पारसले गुनासो गरे । बरु तातोपानी गाउँपालिकाकी उपाध्यक्ष रेवती रावल (पारसकी माइजू) र जुम्लाबाटै समानुपातिक सांसद चुनिएकी छिरिङ लामाले सहयोग गरेको उनले बताए ।
१२ दिनसम्म शव आइपुग्ने आशमा रोएरै बसेको पारस बताउँछन् ।
वैदेशिक रोजगार बोर्डले तिलकको शव लैजान निःशुल्क शववाहनको व्यवस्था गरिदिएको छ ।
भावविह्वल श्रीमती, छोरा र आफन्त तिलकको शव लिएर गृहजिल्ला जुम्ला लागेका छन् । उनको परम्पराअनुसार गाउँमै अन्त्येष्टि हुने छ ।
‘माओवादी जनयुद्ध’ का सर्वोच्च कमान्डर पुष्पकमल दाहाल प्रचण्ड तेस्रो पटक प्रधानमन्त्री भइरहँदा उनलाई प्रधानमन्त्री बनाउन शरीरमा गोलीका छर्रा बोकेर हिँडेका लडाकु कमाण्डर तिलक परिवार पाल्न साउदी हानिएपनि आफ्नो सपना पुरा गर्न सकेनन् ।
देश बदल्ने अठोट लिएका उनले आफू र आफ्नो परिवारको अवस्था बदल्न विदेश भासिनुपर्यो । वृद्ध बा–आमा श्रीमती र तीन छोरा छोरीको साहारा तिलक ४० वर्षको उमेरमै मृत्युबरण गर्न बाध्य भए ।
