स्याङजा बजार । स्याङजाको वालिङमा प्रभुको हेलिकप्टरका पाइलटलाई कुटेको आरोपमा छ जनालाई प्रहरीले पक्राउ गरेको छ । जिल्ला प्रहरी कार्यालयका अनुसार २०७९ माघ १० गते मङ्गलबार उनीहरू पक्राउ परेका हुन् ।
पक्राउ पर्नेमा हेलिकप्टर ल्यान्ड गराउने यात्रु विनोद गैह्रे, उज्वल थापा, शुशील गिरी र खिमबहादुर राना र खेल आयोजक यामबहादुर गुरुङ, सुरेश श्रेष्ठ रहेको निरीक्षक पदमराज थापाले बताए ।
पक्राउ परेकामाथि अभद्र व्यवहारसम्बन्धी कसुरमा मुद्दामा दुई दिन म्याद थप गरी अनुसन्धान भइरहेको प्रहरीले जनाएको छ ।
माघ ५ गते स्याङ्जाको वालिङमा फुटबल खेल भइरहेको मैदानमा हेलिकप्टर ल्यान्ड गरेपछि पाइलट र यात्रुमाथि हातपात गरिएको थियो ।
वालिङ नगरपालिका–९ का विनोद गैरे, खिमबहादुर थापा, सुशील गिरी, सुशील थापाले उक्त हेलिकप्टर चार्टर गरेर वालिङ लगेका थिए । उनीहरूले नै मैदानमा हेलिकप्टर उतार्न दबाब दिएपछि पाइलट रानेश डङ्गोलले ल्याण्ड गरेका थिए ।
वालिङ गोल्डकपको सेमी फाइनलमा एभिनियर एफसी क्यामरुन र वालिङ एफसी जुनियरबिच प्रतिस्पर्धा भइरहेको थियो ।
