काठमाडौं । नेपाल कम्युनिस्ट पार्टी (मसाल) ले पृथ्वी नारायण शाहको जन्मजयन्तीमा सार्वजनिक बिदा दिने सरकारको निर्णयलाई स्वागत गरेको छ ।

नेपाल राष्ट्र निर्माणमा पृथ्वीनारायण शाहको उच्च योगदान रहेको भन्दै मसालले एकीकरणकर्ता पृथ्वी जयन्तीमा बिदा नदिने विगतका सरकारको गल्ती वर्तमान सरकारले सच्याएको बताएको छ ।

महामन्त्री मोहनविक्रम सिंहद्वारा जारी वक्तव्यमा पृथ्वीजयन्तीमा बिदा दिनु उनीप्रतिको सम्मान भएको स्पष्ट पार्नुभएको छ । सार्वजनिक बिदाका लागि सबैभन्दा बढी पहल राप्रपाले गरेको उल्लेख गर्दै सिंहले राप्रपाको भूमिका भने राजतन्त्र पुनर्स्थापनाका लागि भएको भन्दै सचेत रहनसमेत आग्रह गर्नुभएको छ ।

यस्तो छ वक्तव्य
सरकारले पृथ्वी जयन्तीको दिन पुष २७ गते सार्वजनिक बिदा दिने निर्णय गरेको छ । त्यो निर्णयलाई हाम्रो पार्टीले स्वागत गरेको छ । हाम्रो पार्टीले पनि पहिलेदेखि नै पृथ्वी जयन्तीका दिन सार्वजनिक विदा दिनुपर्ने माग गर्दै आएको थियो । नेपालको एकीकरणमा पृथ्वीनारायण शाहको ऐतिहासिक भूमिका रहेको छ । त्यसैले उनको जन्मजयन्तीका दिन सार्वजनिक विदा दिनु उनको त्यस प्रकारको ऐतिहासिक भूमिकाका लागि सम्मान गर्नु नै हुन जान्छ । यो खुसीको कुरा हो कि उनको जन्मजयन्तीका दिन सार्वजनिक विदा नदिएर गत सरकारहरूले जुन गल्ती गरेका थिए, त्यो गल्तीलाई वर्तमान सरकारले सच्याएको छ र त्यसका लागि हामीले वर्तमान सरकारलाई धन्यवाद दिन चाहन्छौँ ।

यो वास्तविकतातिर पनि हाम्रो पार्टीको ध्यान गएको छ कि सरकारद्वारा पृथ्वी जयन्तीका दिन सरकारलाई सार्वजनिक बिदा दिने निर्णय गर्न लगाउनेका पछाडि मुख्य रूपले राष्ट्रिय प्रजातन्त्र पार्टीको भूमिकाले नै काम गरेको छ । तर यो कुराप्रति पनि हाम्रो ध्यान छ कि उनीहरूको त्यस प्रकारको भूमिकाको पछाडि राजतन्त्रको पुनस्र्थापनाका पक्षमा वातावरण तयार पार्ने उद्देश्यले नै काम गरेको छ । नेपालको एकीकरणमा पृथ्वी नारायण शाहको सकारात्मक र ऐतिहासिक भूमिका रहेको छ । उनको त्यस प्रकारको भूमिकाको अभावमा नेपाल राष्ट्रको अस्तित्व नै आउने थिएन्, जसको लागि अहिले हामीलाई गर्व छ । पृथ्वीनारायण शाहको भूमिकाका कारणले जुन राष्ट्रियताको निर्माण भयो, आज त्यसमाथि विभिन्न साम्राज्यवादी शक्तिहरूले कैयौँ दिशाबाट हमला गरिरहेका छन् र त्यो राष्ट्रियताको रक्षा गर्नु आज हाम्रो अहम् दायित्व बनेको छ । यदि पृथ्वीनारायण शाहले नेपाल राष्ट्रको निर्माण नगरेको भए नेपालको राष्ट्रियताको प्रश्न नै उठ्ने थिएन ।

तर पृथ्वीनारायण शाहले नेपाल राष्ट्रको निर्माण गरेपछि लामो इतिहास बितिसकेको छ । त्यसपछि शाहवंशीय राजाहरूले नेपालमा कैयौँ प्रकारका निरङ्कुश, जनविरोधी वा प्रतिक्रियावादी कारबाहीहरू गर्दै आएका छन् । त्यस सन्दर्भमा तीस वर्ष लामो निरङ्कुश र पञ्चायती तानाशाही व्यवस्थाको कालो इतिहास पनि हाम्रा अगाडि छ । राजावादीहरूले पृथ्वीनारायण शाहलाई अगाडि सारेर विश्वस्तरमा र नेपालमा पनि प्रतिक्रियावादी बनिसकेको राजतन्त्रलाई पुनस्र्थापना गर्न चाहन्छन् । पृथ्वीनारायण शाहको नेपालको एकीकरणमा रहेको उच्च र ऐतिहासिक भूमिकालाई सम्मान गर्दागर्दै पनि उनको आडमा गणतन्त्रलाई समाप्त गरेर राजतन्त्रको पुनर्स्थापना गर्ने सबै प्रतिक्रियावादी प्रयत्नहरूको हामीले दृढतापूर्वक विरोध गर्दछौँ ।

२०७९ पुष २७ गते
मोहनविक्रम सिंह
महामन्त्री