काठमाडौं । राष्ट्रिय जनमोर्चाका सांसद दुर्गा पौडेलले संसदले एमसीसी प्रस्तावलाई दृढतापूर्वक अस्विकार गर्नुपर्ने बताउनुभएको छ। मंगलबार सभामुख अग्नि सापकोटालाई बधाई दिन बसेको प्रतिनिधिसभाको बैठकमा सांसद पौडेलले अमेरिकी दूतावासले नै एमसीसीलाई इण्डोप्यासिफिक रणनीतिको अंग बताइसकेको अवस्थामा अब अलमल गर्न नहुने बताउनुभयो ।
‘एमसीसी के हो? त्यसबारे गहन छलफल हुन जरुरी छ। त्यसका प्रावधानहरु के के हुन् ? एमसीसी इण्डो प्यासिफिक रणनीतिको अंंग हो कि होइन? कतिपय पार्टीहरुभित्र यसबारे चर्को बहस पनि भएको छ।’ पौडेलले भन्नुभयो, ‘एमसीसी इण्डो प्यासिफिक रणनीतिको अंग हो कि होइन भन्ने कुरा जव चर्कोसँग आयो, स्वयम् अमेरिकी दूतावास र अमेरिकी असिस्टेन्ट सेक्रेटरी मिसेन अलाइन्स वेलले भन्नुभयो कि वास्तवमै एमसीसी इण्डोप्यासिफिक रणनीतिको अंग हो भनेर ।’
उहाँले सोभियत संघलाई घेर्न अमेरिकाले नर्थ एटलान्टिक नीति ल्याएजस्तै चीन घेर्न इण्डोप्यासिफिक रणनीति अबलम्बन गरेको बताउनुभयो । उहाँले भन्नुभयो, ‘यसको प्रावधान र सम्झौताहरुलाई हेर्नुभयो भने वास्तवमा अमेरिकी साम्राज्यवादले आफ्ना नीतिहरुलाई अघि लैजानका लागि सोभियत संघलाई घेरा हाल्नका लागि नर्थ एटलान्टिक रणनीति अबलम्बन गरेको थियो । अहिले दक्षिण एशियाली राष्ट्रहरुलाई आफ्नो चंगुलमा पार्नको इण्डोप्यासिफिक रणनीति अबलम्बन गरेको छ ।’
कसैको सहयोग लिँदा देशलाई नै धरापमा पार्न नहुनेमा सांसद पौडेलको जोड छ । ‘हामीले कसैको सहयोग लिन हुन्न भन्ने होइन तर सहयोग लिँदा त्यसका सर्त कस्ता छन् हेर्नुपर्छ । पाएँ त खाएँ भने झैँ देशलाई नै धरौटीमा राखेर कसैको सहयोग लिन सकिँदैन । यो विषय राष्ट्रियतासँग जोडिएको विषय हो । देशको भौगोलिक अखण्डतासँग जोडिएको विषय हो । त्यसैले यस विषयमा संसद गम्भीर भएर यसलाई अस्वीकार गर्नुपर्छ’ उहाँले भन्नुभयो ।
प्रतिनिधिसभा विधी निर्माण गर्ने थलो भएको र अहिले थुप्रै विधेयकहरु रोकिएको अवस्थामा रहेकाले तिनलाई अगाडि बढाउन संसदले नयाँ सभामुख पाएसँगै सहज बन्ने सांसद पौडेलको विश्वास छ । त्यस्तै मिडिया काउन्सिल विधेयकलाई पनि सुझबुभका साथ अगाडि बढाउनुपर्ने आवश्यकता रहेको उहाँले बताउनुभयो । ‘एकातिर प्रेसका विकृतिलाई रोक्नुपर्ने जरुरी पनि छ र प्रेस स्वतन्त्रतामाथिको अंकुशलाई हटाउनु पनि पर्छ’ उहाँले भन्नुभयो ।
