कपिलवस्तु । राष्ट्रिय जनमोर्चा शिवराज नगर समितिको आयोजनामा माओ दिवस मनाइएको छ ।
कपिलवस्तुको शिवराज नगरपालिका चन्द्रौटामा आयोजित कार्यक्रममा माओको योगदान र जीवनीबारे प्रशिक्षणसहित माओत्सेतुङको १३०औँ जन्म दिवस मनाइएको हो ।
राजमो शिवराज नगर समिति अध्यक्ष तथा जिल्ला सदस्य केरसिंह पुनको अध्यक्षतामा भएको प्रशिक्षण कार्यक्रममा अखिल नेपाल ट्रेड युनियन महासंघ (अन्टुक)का केन्द्रीय सदस्य तथा जिल्ला सल्लाहकार केर सिंह अदै र जातीय समता समाजका केन्द्रीय सल्लाहकार दिलबहादुर विकले चीनको समग्र राजनीतिक इतिहास, सन यातसेन्को नेतृत्वमा भएको पूँजीवादी क्रान्ति, सन् १९२१ मा कम्युनिस्ट पार्टी स्थापना भए देखि सन् १९४९ सम्म चीनको कम्युनिस्ट पार्टीले गरेका संघर्ष, पार्टीभित्रको आन्तरिक मतभेद, साम्राज्यवादसँगको संघर्ष, जापानी साम्राज्यवादविरुद्ध संघर्ष र सन् १९४९ मा माओत्सेतुङले नयाँ जनवादी गणतन्त्र घोषणा गरे पछिको सन् १९७६ सम्ममा भएको परिवर्तनको बारेमा धारणा प्रस्तुत गर्नुभएको थियो ।
कार्यक्रममा रक्तिम सांस्कृतिक अभियान कपिलवस्तुका कलाकारहरुले उपस्थित सबैलाई रातो लालटिन गीतले स्वागत गरेका थिए ।
कार्यक्रममा अखिल नेपाल स्वतन्त्र विद्यार्थी युनियन (छैठौं) की जिल्ला अध्यक्ष सञ्जीला बुढा मगर, अखिल नेपाल महिला संघ कपिलवस्तु जिल्ला सह सचिव बिनिता अदै, जातीय समता समाजका जिल्ला सदस्य तथा नगर समिति अध्यक्ष मोहन विक, भूपू जिल्ला अध्यक्ष बलराम सुनार, मूल प्रवाह अखिल भारत नेपाली एकता समाजका केन्द्रीय सदस्य राम बहादुर विकको आतिथ्यता रहेको थियो ।
राजमो नगर सचिव तथा रक्तिम सांस्कृतिक अभियान कपिलवस्तुका अध्यक्ष बेगम बुढा मगरले कार्यक्रमको सञ्चालन गर्नु भएको थियो ।
