काठमाडौं । नेकपा (माओवादी केन्द्र) का नेता नारायणकाजी श्रेष्ठ उपप्रधानमन्त्री बन्ने भएका छन् । माओवादीको पदाधिकारी बैठकले श्रेष्ठलाई उपप्रधानमन्त्री बनाउने निर्णय गरेको हो ।
उनको मन्त्रालयलको भने टुंगो लागेको छैन । श्रेष्ठ राष्ट्रिय सभा सदस्य हुन् ।
प्रधानमन्त्रीमा नियुक्त पुष्पकमल दाहालले आज (सोमबार) अपरान्ह ४ बजे शपथ लिनासाथ सानो आकारको मन्त्रिमण्डल गठन गर्ने तयारी छ । त्यसमा माओवादीबाट श्रेष्ठसहित नेकपा एमालेका केही मन्त्रीले पनि शपथ लिनेछन् ।
एमालेले सात दलीय गठबन्धनमा ६ वटा मन्त्रालय पाउने भएको छ। पार्टीबाट सरकारमा पठाउने मन्त्रीबारे निर्णय लिन अध्यक्ष केपी शर्मा ओलीनिवास बालकोटमा छलफल चलिरहेको छ। एमालेले यसअघि सरकारबारे निर्णय लिने जिम्मा ओलीलाई दिएको छ। ओलीले नै ती नामहरुको टुंगो लगाएको बताइएको छ।
एमालेबाट उपाध्यक्ष विष्णु पौडेलले सरकारको नेतृत्व गर्ने सम्भावना छ । तर उनको मन्त्रालयको टुंगो भइसकेको छैन ।
ओलीसहित छलफलमा महासचिव शंकर पोखरेल, उपमसहासचिव विष्णु रिमाललगायत नेताहरु सहभागी छन् ।
यस्तै, सरकारको नेतृत्वकर्ता नेकपा माओवादी केन्द्रको पनि मन्त्रीको नाम टुंगो लगाउन पेरिसडाँडामा पदाधिकारी बैठक बसिरहेको छ।
सात दल र ३ स्वतन्त्र गरी १६९ सांसदको समर्थनमा हिजो मात्र माओवादी केन्द्रका अध्यक्ष प्रचण्ड प्रधानमन्त्री बनेका छन्।
