काठमाडौँ । नेकपा (मसाल) ले प्रतिगामी भूमिकामा रहेको एमालेलगायतसितको साँठगाँठमा नेकपा (माओवादी केन्द्र) का अध्यक्ष पुष्पकमल दाहाल प्रचण्ड प्रधानमन्त्री बन्नुलाई जनतासितको धोका भएको बताएको छ ।
महामन्त्री मोहनविक्रम सिंहको हस्ताक्षरमा २०७९ पुस १० गते आइतबार जारी प्रेसवक्तव्यमामार्फत पार्टीले यस्तो अवधारणा सार्वजनिक गरेको हो ।
प्रेसवक्तव्यमा गत निर्वाचनमा प्रतिगमन विरुद्ध चुनावी तालमेल गरी फेरि एमालेसित नै प्रधानमन्त्रीका लागि साँठगाँठ गर्नुलाई प्रचण्डको सिद्धान्तहीन, अराजनीतिक र हद दर्जाको अवसरवादी कार्य बताइएको छ ।
प्रचण्डले प्रतिगामी शक्ति मात्रै होइन, अमेरिकी र भारतीय साम्राज्यवादी तत्त्वसँग पनि प्रधानमन्त्रीका लागि गठबठन्धन गरेको वक्तव्यमा उल्लेख छ ।
यस्तो छ, प्रेसवक्तव्यको पूर्ण पाठ :
“पाँचदलीय गठबन्धनले लामो समयदेखि एमालेले नेतृत्व गरेको प्रतिगमनको विरुद्ध सङ्घर्ष गर्दै आएको थियो । गत निर्वाचनमा प्रतिगमन विरुद्ध पाँचदलीय चुनावी तालमेलसमेत गरेको थियो । गठबन्धनको तर्फबाट प्रधानमन्त्री पद नपाएको हुनाले प्रचण्डले आफ्नो नेतृत्वमा सरकार बनाउनका लागि एमालेसित साँठगाँठ गर्ने जुन कार्य गरेका छन्, त्यो सिद्धान्तहीन, अराजनीतिक र हद दर्जाको अवसरवादी कार्य हो । त्यो कार्य जनतासित ठुलो धोका पनि हो ।
प्रधानमन्त्री बन्नका लागि उनले सबै प्रतिगामी शक्ति तथा अमेरिका र भारतीय साम्राज्यवादपरस्त तत्त्वहरूसित पनि गठबन्धन गरेका छन् । उनको त्यो कार्यको हामीले कडा शब्दमा निन्दा र भत्र्सना गर्दछौँ ।”
