काठमाडौं । राष्ट्रपति विद्यादेवी भण्डारीले नयाँ सरकार गठन गर्न दलहरुलाई दिएको समयसिमा आज (पुस १०) साँझ ५ बजे सकिँदैछ । हालसम्म को प्रधानमन्त्री बन्ने भन्ने विषयमा दलहरुबीच सहमति जुट्न सकेको छैन ।
सत्ता गठबन्धन दलका नेताहरुबीच आलोपालो प्रधानमन्त्री बन्ने अनौपचारिक सहमति बनेपनि को पहिला प्रधानमन्त्री बन्ने भन्ने विषयमा कुरा नमिल्दा गठबन्धन टुट्ने अवस्थामा पुगेको छ ।
अहिले नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधवकुमार नेपालबीच निर्णयक वार्ता चलिरहेको स्रोतका अनुसार देउवा र दाहाल २/२वर्ष र नेपाल एक वर्ष प्रधानमन्त्री बन्ने सहमति आन्तरिक रुपमा भएको छ । तर, पहिला देउवा कि दाहाल भन्ने विषयमा कुरा मिलेको छैन ।
सत्तागठबन्धनमा जानुअघि प्रचण्डले आफूनिकट नेताहरुसँग अहिले आफूले प्रधानमन्त्री नपाए गठबन्धन टुट्नसक्ने बताएका छन् । प्रचण्डले पछिल्लो समय कांग्रेसले अहिले प्रधानमन्त्री दिने सम्भावना निकै कम देखिएकाले गठबन्धनबाट बाहिरिने सम्भावना बढेको बताएको एक शीर्ष नेताले जानकारी दिए ।
‘गठबन्धन लगभग टुट्यो भन्ने हाम्रो बुझाइ छ’ ति नेताले प्रचण्डको भनाई उदृत गर्दै भने, ‘चुनावी तालमेलमा पनि हामीले धोका पाएका छौँ । पहिलो प्रधानमन्त्री पनि हामीले नपाउने भएपछि किन गठबन्धनमा बस्ने ?’
यसैबीच कांग्रेसले सहमति तोडेको प्रचण्डको सचिवालयले टिप्पणी गरेको छ । सत्ता सहकार्यको लागि कांग्रेस र माओवादीबीच सहमति हुन नसकिरहेको बेलामा दाहालको सचिवालयले यस्तो टिप्पणी गरेको हो ।
दाहालका स्वकिय सचिव रमेश मल्लले सामाजिक सञ्जालमार्फत कांग्रेसको नाम उल्लेख नै नगरी यस्तो टिप्पणी गरेका हुन् ।
उनले ट्विटरमा लेखेका छन्, ‘नेपाली राजनितिको एउटा खराब चित्र र चरित्र यस्तो हुँदै आयो, आफू तल पर्दा एउटा सहमति गर्ने तर आफू माथि पुगे भन्ने भान पर्न थाल्दा सहमति तोडिहाल्ने । पछिल्लो घटनाक्रमले के देखाउँछ कि इतिहासको फेरि दुखान्त पुनरावृत्ति हाम्रा सामु छ।’
यता, नेकपा (एमाले) ले भने सत्तागठबन्धनको निर्णय कुरिरहेको जनाएको छ । एमालेले गठबन्धन तोडेर आफ्नै नेतृत्वमा सरकार गठन गर्ने प्रयास गरिरहेको छ भने आफ्नो नेतृत्वमा सरकार बन्न नसक्ने अवस्था आए राष्ट्रपति पद लिएर भएपनि सत्तामा जाने प्रयास गरिरहेको छ ।
यद्यपी, राष्ट्रपतिले दिएको बहुमतको सरकार गठन गर्ने समय आज शुक्रबार साँझ पाँच बजेसम्म दलहरुले सहमति गर्न नसके राष्ट्रपतिबाट संसदको ठूलो दलको हैसियतले सरकार गठन गर्न पुनः आह्वान हुने र त्यो अवस्थामा देउवा प्रधानमन्त्री बन्ने सम्भावना देखिन्छ ।
