काठमाडौं । नेपाली कांग्रेसका प्रवक्ता डा. प्रकाशशरण महतले गैरवामपन्थी सरकार बन्न सक्ने औँल्याएका छन् । सञ्चारकर्मीसँग कुरा गर्दै डा. महतले एमाले र कांग्रेसका बीचमासमेत सत्ता साझेदारी हुनसक्ने बताए ।
‘कांग्रेसको प्राथमिकता गठबन्धन हो । गठबन्धनमा यताउता हुँदा नेपाली कांग्रेसले पनि विभिन्न विकल्पमा गएर नेतृत्वमा पुग्न सक्छ’ उनले भने, ‘गैरवामपन्थी गठबन्धन बन्न सक्छ, एमालेसँग पनि हुन सक्छ ।’
यस्तै, उनले माओवादी केन्द्रका अध्यक्ष पुष्पकमल दाहालले प्रधानमन्त्री पदमा गरेको दाबी स्वाभाविक भएपनि प्रधानमन्त्री पदलाई प्रमुखता दिन आवश्यक नरहेका बताए ।
महतले नेकपा एमाले जसरी पनि सत्तामा जाने अभ्यासमा लागेको आरोप पनि लगाए ।
‘गठबन्धन दलहरुबीच सरकारको नेतृत्व गर्ने विषयमा कुराकानी भइरहेको छ । सहमति पनि बन्ला । एमालेका तर्फबाट पनि सरकार निर्माणका लागि कसरत हुने नै भयो । उहाँहरु सबै खाले अभ्यासमा लाग्नुभएको छ । हामी एमालेजस्तो जसरी पनि सरकार बनाउने वा कुनै पनि हालतमा सत्तामा जाने सोचमा छैनौं’ डा. महतले भने ।
संसदको सबभन्दा ठूलो पार्टी भएकाले नयाँ सरकारमा कांग्रेसको नेतृत्व स्वाभाविक भएको पनि उनको भनाई छ ।
सरकारको नेतृत्वका विषयमा अनावश्यक बहस आवश्यक नभएको पनि डा. महतले बताए । पार्टी संसदीय दलमा शेरबहादुर देउवा नै सर्वसम्मति हुने पनि उनले बताए ।
