काठमाडौं । नेपाल कम्युनिष्ट पार्टी (मसाल) का विरुद्ध श्रृंखलाबद्धरुपमा झुठा समाचार सम्प्रेषण गर्ने पत्रिका विरुद्ध प्रेस काउन्सिलमा उजुरी दर्ता गरिएको छ । सोमबार नेकपा (मसाल) का तर्फबाट प्रवक्ता रामप्रकाश पुरी र राष्ट्रिय जनमोर्चाका तर्फबाट उपाध्यक्ष दुर्गा पौडेलले उजुरी दर्ता गराउनुभएको हो ।

उजुरी दर्ता गरेपछि प्रवक्ता पुरीले पार्टी र पार्टीको नेतृत्वविरुद्ध चरित्र हत्या गर्ने विरुद्ध कानुनी उपचार खोजिएको युगदर्शनलाई प्रतिक्रिया दिनुभयो । उहाँले नेकपा (मसाल) ले निस्वार्थरुपमा राष्ट्रियता र जनताका पक्षमा गरिरहेको संघर्षविरुद्ध सञ्चालित देशी विदेशी एजेण्टहरु मसालको उच्च राजनीतिक चरित्रमाथि लगातार हिलो छ्याप्ने प्रयास गरिरहेकाले उनीहरुलाई दुरुत्साहन गर्न आवश्यक रहेको बताउनुभयो ।

नेकपा (मसाल) र राजमोले यसअघि उनीहरुविरुद्ध काठमाडौं जिल्ला अदालतमा समेत मुद्दा दर्ता गरेको छ ।

ताजाखबर साप्ताहिक नामक एक पत्रिकाले लगातार नेकपा (मसाल)का महामन्त्री मोहनविक्रम सिंहलगायत वरिष्ठ नेताहरुको चरित्र हत्या गर्ने खालका समाचार सम्प्रेषण गर्दै आएको छ भने कतिपय अनलाइनले सो पत्रिकाको नियत नबुझेरै समाचार साभार गर्ने गरेका छन्।

सो पत्रिकाले ‘प्रचण्डको कमाण्डमा चन्द र भट्टराई फर्कने मन्त्री माग्दै मोहन विक्रम खुमालटारमा’ भन्ने झुट्टा एवम् काल्पनिक समाचार प्रकाशित गरेको र सोही समाचारलाई आधार लिई अनलाइन पत्रिका रिपोर्टस नेपालले पुष २, २०७६ मा र रिपब्लिका दैनिकले पुष २५, २०७६ मा प्रकाशन गरेका थिए।

यस्तै, सो साप्ताहिकले पुनः पुष १५, २०७६ मा ‘महामन्त्री मोहन विक्रम सिंहले प्रथमतः शुरु गरेर विज्ञप्ती प्रकाशित गर्दै समाचारलाई झुट भने पनि अनौंठो नमाने हुन्छ । किनकी उनी पहिला प्रधानमन्त्री केपी ओलीसंग श्रीमतीलाई मन्त्री बनाई दिन निकै धाए । ओलीले वेवास्ता गरे पछि खुमालटार धाउन थालेको प्रमाण समाचार सुत्रले गोप्य राखेको छ ।’ भन्ने शिर्षकको झुट्टा, काल्पनिक, निराधार एवम असत्य कुराले भरिएको समाचार मुलक लेख प्रकाशित गरको छ ।

त्यसै गरी सोही लेखमा ‘प्रचण्डले डा. भट्टराईलाई कारवाही गर्दा (रोल्पा फुल्टीवाङ्ग बैठकबाट) उनको बचाउका निम्ति यिनै क्रान्तिकारी सिंह दिल्ली पुगेर एसडी मुनीलाई भेटेको तथ्य हामीसँगै छ ।’ भन्ने जस्तो अत्यन्तै झुट्टा एवम् काल्पनिक समाचार सम्प्रेषण गरेको छ ।

सो कार्यले पार्टीको गरिमामा आँच आउने तथा पार्टीका जिम्मेवार कमरेडहरुको मानमर्दन गर्ने काम निन्दनीय एवम प्रेश काउन्सिल ऐन २०४८ र पत्रकार आचार संहित २०७३ को खिलापमा भएकोले भन्दै यसको कानूनी उपचारको लागि राष्ट्रिय जनमोर्चाकी उपाध्यक्ष एवम प्रवक्ता तथा सांसद दुर्गा पौडेल र नेपाल कम्युनिष्ट पार्टी मसालको तर्फबाट प्रवक्ता रामप्रकास पुरीले प्रेस काउन्सिलमा निवेदन दर्ता गराउनु भएको हो ।