काठमाडौं । भारत र चीनको सीमा क्षेत्र अरुणाचल प्रदेशको तवांग क्षेत्रमा भारत र चीनका सैनिकबीच झडप भएको छ । भारतीय सेनाका प्रवक्ताका अनुसार ९ डिसेम्बरमा दुवै पक्षबीच झडप भएको हो ।
चिनियाँ सेना अरुणाचल प्रदेशको तवांग सेक्टरमा प्रवेश गरेपछि भारतले जबाफी कारबाही गरेको भारतीय सैनिक प्रवक्ताको दाबी छ । झडपमा दुवै पक्षका केही सैनिक घाइते भएका छन् ।
झडपपछि शान्ति कायम गर्न इलाका कमाण्डरले चिनियाँ समकक्षीसँग वार्ता गरेका थिए भने दुवै देशका सेना तत्काल घटनास्थलबाट पछि हटेका बीबीसीले जनाएको छ ।
लद्दाखको गलवान उपत्यकामा सन् २०२० को जुन महिनाको १५ तारिखमा दुई देशका सैनिकहरूबीच भएको हिंसात्मक झडपपछिको यस प्रकारको यो पहिलो घटना हो।
सन् २०२० को जुन महिनामा पूर्वी लद्दाखको गलवानमा चीन र भारतका सैनिकहरूबीच रक्तपातपूर्ण भिडन्त हुँदा भारतका २० सैनिक मारिएका थिए।
भारतले गलवानमा ठूलो सङ्ख्यामा चिनियाँ सैनिक पनि मारिएको बताउँदै आएको छ। तर चीनले चारजना सैनिकको मृत्यु भएको पुष्टि गरेको छ।
सन् २०२२ को फेब्रुअरीमा अस्ट्रेलियाको एक पत्रिका ुद क्लाक्सनु ले आफ्नो एक अनुसन्धानात्मक रिपोर्टमा गलवानमा चार चिनियाँ सैनिक नभइकन कैयौँ गुणा धेरै अर्थात् कम्तिमा ३८ पीएलए सैनिकको मृत्यु भएको दाबी गरेको थियो।
यस वर्ष चिनियाँ कम्युनिस्ट पार्टीको बैठकमा गलवान झडपमा भाग लिने एक कमाण्डरलाई चीनले अतिथिको रूपमा आमन्त्रित गरेको थियो।
सन् २०२० मा भारत र चीनबीच गम्भीर अवस्था सिर्जना भएको थियो।
१ मेमा पूर्वी लद्दाखको पान्गोङ त्सो तालको उत्तरी किनारमा दुई देशका सैनिकहरूबीच झडप भएको थियो।
जस क्रममा दुवै पक्षका दर्जनौँ सैनिक घाइते भएका थिए र त्यसपछि १५ जुनमा गलवान उपत्यकामा दुई देशका सैनिकबीच पुनः झडप भयो।
त्यस झडपका बारेमा १६ जुनमा आएको भारतीय सेनाको विज्ञप्तिमा भनिएको थियो, ‘घटनास्थलमा ड्युटीमा रहेका १७ सिपाहीको गम्भीर चोटका कारण मृत्यु भएको छ। यस द्वन्द्वमा मारिने सैनिकको सङ्ख्या २० पुगेको छ।’
चीनले समेत एक विज्ञप्ति जारी गर्दै मारिने सैनिकको सङ्ख्या स्पष्ट नभएको जनाएको थियो। कैयौँ महिनापछि सन् २०२१ को फेब्रुअरीमा चीनले गालवान उपत्यकाको भिडन्तमा मारिएका आफ्ना चार सैनिकहरूलाई मरणोपरान्त पदकले सम्मान गर्ने घोषणा गरेको थियो।
