काठमाडौं । कर्मचारीको गल्तीले देशका विभिन्न भागमा मतदानका क्रममा गडबढी भएका समाचाहरु आइरहेका छन् । त्यसरी गडबढी भएका स्थानमा मतदान रद्द गरी पुनः मतदान भइरहेका छन् ।
गुल्मीको मालिका गाउँपालिका वार्ड नम्वर ५ छाप माविको ‘क’ मतदान केन्द्रमा ५४ मत खसेपछि मतदान बदर भयो ।
प्रतिनिधि सभा उमेदवार रामकुमारी झाँक्रीको चुनाव चिह्न कलम नभएको ५४ मतपत्र खसेपछि विवाद बढेको थियो ।
सर्वदलीय बैठक बसी जाँचबुझ गर्दा प्रतिनिधि सभाको मतपत्र दिनुपर्नेमा प्रदेश सभाको मतपत्र दिइएको थाहा लागे पछि उक्त केन्द्रका सहायक मतदान अधिकृत महलाल पौड्याललाई बदल्ने गरि पुनःमतदान गर्ने सहमती दलहरुबिच भएको छ ।
वडा अध्यक्ष रेखा कुमार जिसीले दिएको जानकारी अनुसार ११ बजे देखि पुनःमतदान शान्तिपूर्णरुपमा भइरहेको छ ।
यता, बाँकेको कोहलपुर नगरपालिका–१० स्थित हाई स्कुल मतदान केन्द्रमा प्रदेशसभाको मत संघमा खसाइएपछि विवाद भएको छ।
उक्त केन्द्रका मतदान अधिकृत प्रकाश अधिकारीले हस्ताक्षर गरेर दिएका प्रदेशका २९ वटा मत संघतिर गएपछि विवाद भएको हो।
त्यसपछि मतदान अधिकृत अधिकारीले गल्ती स्वीकार्दै प्रदेशको मत संघमा खसाएका २९ जनालाई फेरि मतदान अवसर दिएका छन्।
