काठमाडौँ । प्रतिनिधिभा र प्रदेशसभा सदस्यका लागि आज २०७९ मङ्सिर ४ गते आइतबार भइरहेको मतदान शान्तिपूर्ण वातावरणमा उत्साहजनक र व्यवस्थित प्रकारले सम्पन्न भइरहेको दाबी गरिएको छ ।
आमनिर्वाचन पर्यवेक्षण समितिका तर्फबाट निर्वाचन पर्यवेक्षणमा रहनुभएका पूर्वप्रमुख निर्वाचन आयुक्त भोजराज पोखरेलले व्यवस्थित र शान्तिपूर्ण ढङ्गबाट मतदान भइरहेको बताउनुभएको हो ।
सप्तरी जिल्लामा निर्वाचनको पर्यवेक्षणमा रहनुभएका अर्का पूर्वप्रमुख आयुक्त डा. अयोधिप्रसाद यादवले उत्साहित र व्यवस्थित रूपमा पङ्क्तिबद्ध भएर मतदाता मतदानको अधिकार प्रयोग गरिरहेको प्रतिक्रिया दिनुभयो ।
पूर्वप्रधान न्यायाधीश कल्याण श्रेष्ठले बिहान सबेरैदेखि मतदाता लाइनमा बसेर मतदानमा भाग लिइरहनुभएको बताउनुभयो । उहाँले भन्नुभयो– ‘शान्त वातावरणमा मतदान सञ्चालन भइरहेको छ । मतदाता उत्साहित छन् । कतिपय मतदान स्थलमा मतदाता बिहान सबेरैदेखि मतदानका लागि लाइनमा बसेको देखिन्थ्यो ।’
यद्यपि चिसो मौसमका कारण कतिपय मतदान स्थलमा बिहान ८ बजेदेखि मात्रै मतदाताको उपस्थिति बाग्लो भएको देखियो ।
