गोरखा बजार । गोरखाको एउटा मतदान केन्द्रमा पुग्न जिल्ला निर्वाचन कार्यालयका कर्मचारी एक हप्ता पैदल हिँडेका छन् ।
जिल्लाको दुर्गम चुमनुब्री गाउँपालिकामा झ्रन्डै एक साता हिँडेर मतदान अधिकृत, कर्मचारी सुरक्षाकर्मी मतदान केन्द्रमा पुगेका हुन् ।
चुमनुब्री गाउँपालिका–१ को सामागाउँको साम्दो पुग्न झण्न्डै एक हप्ता लाग्ने गाउँपालिका अध्यक्ष निमा लामाले जानकारी दिनुभयो । विकट चुमनुब्री गाउँपालिकामा २२ ओटा मतदान केन्द्र छन् ।
गोरखामा प्रतिनिधि सभाको दुई र प्रदेशसभाको चार निर्वाचन क्षेत्र रहेका छन् । मङ्सिर ४ गते हुन लागेको निर्वाचनका लागि जिल्लाका दुई सय २२ मतदानस्थल र तीन सय १७ ओटै मतदान केन्द्रमा मतदान अधिकृतसहितका कर्मचारी पुगेर निर्वाचनको तयारी पूरा गरेको मुख्य निर्वाचन अधिकृतको कार्यालयले जनाएको छ ।
जिल्लाभित्र निर्वाचनलाई निर्वाचन शान्तिपूर्ण रूपमा सम्पन्न गर्न तीनओटा घेरामा सुरक्षा संयन्त्र परिचालन गरिएको प्रमुख जिल्ला अधिकारी शङ्करहरि आचार्यले जानकारी दिनुभयो । हरेक मतदानस्थलमा पाँच जना र मतदान केन्द्र दुईओटा भए थप दुई जनाका दरले नेपाल प्रहरी परिचालन गरिएको उहाँले बताउनुभयो ।
‘मतदान केन्द्रको पहिलो घेरामा नेपाल प्रहरी र म्यादी प्रहरी परिचालन गरिएको छ’ प्रमुख जिल्ला अधिकारी आर्चायले भन्नुभयो– ‘त्यसभन्दा बाहिरी घेरामा सशस्त्र प्रहरीको टोली रहने छ भने तेस्रो घेरामा नेपाली सेनाले सुरक्षा प्रदान गर्ने छ ।’
उहाँले ७६ ठाउँमा नेपाली सेना र २० ठाउँमा सशस्त्र प्रहरीको टोली परिचालन गरिएको जानकारी दिनुभयो । आवश्यक परेको खण्डमा १० मिनेटभित्रमा नै पुग्न सक्ने गरी नेपाली सेना र सशस्त्र प्रहरी खटिएको उहाँको भनाइ छ ।
गोरखा जिल्लाअन्तर्गत प्रतिनिधि सभा क्षेत्र नम्बर १ मा एक लाख १५ हजार तीन सय ९७ मतदाता छन्, जसमा ५८ हजार २२ जना महिला र ५७ हजार तीन सय ७५ जना पुरुष छन् ।
त्यस्तै, प्रतिनिधि सभा क्षेत्र नम्बर २ मा एक लाख पाँच हजार दुई सय ४० मतदाता छन् । २ नम्बर क्षेत्रमा रहेका कुल मतदातामध्ये ५२ हजार तीन सय ९९ जना पुरुष र ५२ हजार आठ सय १४ महिला मतदाता छन् । (रासस)
