पोखरा । राष्ट्रिय जनमोर्चाको समानुपातिक उम्मेदवार प्रचार अभियानद्वारा कास्कीको पोखरामा सभा सम्पन्न गरिएको छ ।
केन्द्रीय उपाध्यक्ष जनकराज शर्माको प्रमुख आतिथ्यमा २०७९ कात्तिक २६ गते उक्त कार्यक्रम सम्पन्न भएको हो ।
सो अवसरमा मन्तव्य राख्दै उहाँले प्रतिनिधि सभा र प्रदेशसभाको प्रत्यक्ष सिटतर्फ वाम–लोकतान्त्रिक गठबन्धनलाई मतदान गर्न आह्वान गर्नुभयो ।
प्रतिगामी खतरा अहिले पति यथावत रहेको उल्लेख गर्दै उहाँले त्यसबाट जोगिएर गत जनआन्दोलनका उपलब्धिको रक्षार्था वाम–लोकतान्त्रिक गठबन्धनलाई विजयी गराउनुको विकल्प नरहेको भनाइ राख्नुभयो ।
मन्तव्यको क्रममा उहाँले देशमा लोकतन्त्र, राष्ट्रियता र धर्म निरपेक्षताको रक्षा तथा सङ्घीयताको खारेजीका लागि राजमोका समानुपातिकतर्फका उम्मेदवारलाई विजयी गराउन आग्रह गर्नुभयो ।
‘यदि तपाईंहरू देशमा लोकतन्त्र, राष्ट्रियता र धर्म निरपेक्षताको रक्षा र सङ्घीयताको खारेजी होस् भन्ने चाहनुहुन्छ भने राजमोलाई भोट हाल्नुस्’ उहाँले अगाडि भन्नुभयो– ‘राजमो मात्र देश र जनताको पक्षमा सम्झौताहीन सङ्घर्ष गर्ने देशको एक मात्र राजनीतिक पार्टी हो ।’
उहाँले सही राजनीतिक पार्टीको चुनाव गर्ने सही अवसर अहिले उपलब्ध भएको भन्दै आम जनतासित बारम्बार गल्ती नगर्न पनि आग्रह गर्नुभयो ।
सभामा राजमो गण्डकी प्रदेश समितिका अध्यक्ष शङ्कर बराल र रक्तिम सांस्कृतिक अभियानका महासचिव जीवन शाहीले पनि सम्बोधन गर्नुभएको थियो ।
कार्यक्रममा अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल राष्ट्रिय उद्योग व्यापार सङ्घका सन्तोष पौडेल, किसान महासङ्घकै केन्द्रीय सदस्य चन्द्रबहादुर केसी, प्रतिनिधि सभातर्फ राजमोका समानुपातिक उम्मेदवार लक्ष्मी कुँवर, गण्डकी प्रदेशसभामा राजमोका समानुपातिक उम्मेदवार रिता घर्तीमिरे विक, शान्ति गुरुङ, दालकुमारी खत्री (जमुना), नेपाली काङ्ग्रेस २५ नं. वडासमितिका सभापति मधुसूदन त्रिपाठी र नेकपा (एकीकृत समाजवादी) का शुकबहादुर विकको आतिथ्य रहेको थियो ।
गण्डकी प्रदेशसभातर्फ राजमो समानुपातिक उम्मेदवार तमबहादुर रोकाको अध्यक्षता तथा राजमो कास्कीका अध्यक्ष रविमोहन ढकालको सञ्चालनमा अघि बढेको उक्त कार्यक्रममा स्वागत मन्तव्य प्रतिनिधि सभातर्फ राजमोका समानुपातिक उम्मेदवार मदनमुरारी घिमिरेले राख्नुभएको थियो ।
अभियान टोली आजै चितवनमा बास बस्न आइपुग्ने छ । भोलि कात्तिक २७ गते टोलीले चितवनमा एक स्थान र नवलपुरमा दुई स्थानमा कोणसभा गर्ने योजना रहेको टोलीमा सहभागी अखिल नेपाल किसान महासङ्घ (अप्फा) का अध्यक्ष भैरवराज रेग्मीले जानकारी दिनुभयो ।
