दिनेस रैदास, दाङ ।
राष्ट्रिय जनमोर्चा दाङले जिल्लामा निर्वाचनको प्रचार अभियान सुरु गरेको छ ।
दाङको गढवा–१ कालाकाटेबाट समानुपातिक निर्वाचनमा पार्टीका उम्मेदवारलाई भोट माग्न राजमोले अभियान सुरु गरेको हो ।
जिल्ला अध्यक्ष गणेश आचार्यको नेतृत्वमा रहेको टोलीले गढवा–१ कालाकाटे २०७९ कात्तिक २० गतेदेखि कार्यक्रम सुरु गरेको छ । राप्ती–२ लालमटियामा समानुपातिक उम्मेदवार गणेश आचार्य, रमेशमान गुरुङ र केशरी आचार्यलगायतले सम्बोधन गर्नुभएको थियो ।
राप्ती–२ लालमटिया ठाकुर आचार्यको अध्यक्षता र रक्तिम सांस्कृतिक दाङ जिल्ला अध्यक्ष अनन्त शर्माको स्वागत मन्तवयबाट सुरु भएको सभालाई सञ्चालन गिरबहादुर पौडेलले गर्नुभएको थियो ।
त्यसैगरी राप्ती–८ सिसहनियामा प्रदेशसभा उम्मेदवार दुर्गालाल केसीले सम्बोधन गर्नुभएको थियो । अखिल नेपाल किसान महासङ्घ दाङका जिल्ला उपाध्यक्ष माधव आचार्यको स्वागत मन्तव्य रहेको उक्त कार्यक्रमको सञ्चालन शमशेर केसीले गर्नुभएको थियो ।
लमही–१ नर्तीमा राजमोको समानुपातिक प्रचार अभियानलाई समानुपातिक उम्मेदवार गणेश आचार्य र केशरी आचार्यलगायतले सम्बोधन गर्नुभएको थियो भने सञ्चालन राजमो लमही नगरपालिका सचिव लेखराज आचार्यले गर्नुभएको थियो।
अभियान कात्तिक २१ गते लमही र राजपुर, कात्तिक २२ गते घोराही–१ हर्नोक, बङ्गलाचुलीको कमिरेचौर, मुर्कुट्टी र धर्नामा कार्यक्रम हुने छ भने कात्तिक २३ गते घोराही, नारायण, बिजौरी हुँदै तुलसीपुरमा कार्यक्रम गरिने छ । त्यस्तै, कात्तिक २४ गते दङ्गिशरण, शान्तिनगर र बबईमा कार्यक्रम हुने राजमो दाङले जनाएको छ ।
