शंकर प्रसाद पोख्रेल, बुटवल ।
आगामी मंसिर ४ गते हुने प्रतिनिधि सभा र प्रदेश सभा निर्वाचनका लागि रुपन्देहीको बुटवलमा गठबन्धनले चुनावी भेला गर्ने भएको छ ।
संयुक्त वाम लोकतान्त्रिक गठबन्धन प्युठान–रुपन्देही समन्वय समितिले बुटवलमा चुनावी भेलाको आयोजना गर्न लागेको हो ।
यही कार्तिक १९ गते शनिबार बिहान साढे १० बजे बुटवलको सुख्खानगरस्थित मेरिगोल्ड होटलमा भेला गर्ने तयारी गरिएको चुनावी भेला आयोजक समितिका संयोजक कृष्ण जिसीले जानकारी गराउनुभएको छ ।
पाँचदलीय गठबन्धन दलका उम्मेदवारहरूलाई जिताउने गरी रुपन्देहीको बुटवलमा चुनावी भेलाको आयोजना गरिएको उहाँले बताउनुभयो ।
एक दिने वृहत चुनावी भेलामा प्युठान जिल्लाबाट प्रतिनिधिसभाका उम्मेदवार दुर्गा पौडेल, प्रदेशसभा क का उम्मेदवार कृष्ण अधिकारी र ख का उम्मेदवार रोज राणा आउने कार्यक्रम रहेको चुनाव परिचालन समितिका प्रदीप जिसीले जानकारी गराउनुभयो।
त्यस्तै गठबन्धन दल प्युठानका प्रमुख तथा अध्यक्षहरुले सम्बोधन गर्ने कार्यक्रम रहेको नेपाली कांग्रेस प्युठान–रुपन्देही सम्पर्क समितिका अध्यक्ष महेश पोखरेलले बताउनुभएको छ।
रुपन्देहीको बुटवल, भैरहवा, सालझण्डी, देवदह लगायतका विभिन्न ठाउँमा बसोवास गर्दै आएका गठबनधन दल समर्थकको भेलाले प्युठानको चुनाव प्रचार प्रसारका लागि कृष्ण जिसी संयोजक रहेको १ सय २५ सदस्य चुनाव परिचालन समितिसमेत गठन गरेको छ ।
