काठमाडौँ । नेपाल समाजवादी पार्टीका अध्यक्ष भट्टराईले विगतका तीतामिठा कुरा बिर्सिएर आगामी निर्वाचनमा गठबन्धनका साझा उम्मेदवारलाई जिताउन आवश्यक भएको बताउनुभएको छ ।
उहाँले देशको विकासका लागि भविष्यमुखी बनेर काम गर्न आवश्यक रहेको जिकिर गर्नुभयो । उहाँले लोकतन्त्र भनेको भद्रगोल हुँदै, अस्तव्यस्त हुँदै अघि बढ्ने प्रक्रिया रहेकाले त्यसको रक्षाका लागि एकजुट हुनुपर्ने बताउनु भयो ।
कात्तिक ७ गते सोमबार गठबन्धनले आयोजना गरेको वागमती प्रदेश स्तरीय भेलालाई सम्बोधन गर्दै पूर्व प्रधानमन्त्रीसमेत रहनुभएका भट्टराईले यस्तो बताउनुभएको हो ।
उहाँले गठबन्धनको मुख्य एजेण्डा भनेको भ्रष्टाचार अन्त्य गर्नु, युवालाई स्वरोजगार प्रदान गर्नु रहेको बताउनुभयो । उहाँले गठबन्धनले देशमा छिटो विकास र समृद्धिको चाहनालाई पूरा गर्ने प्रतिबद्धतासमेत जनाउनुभयो ।
अध्यक्ष भट्टराईले नेपालको सन्दर्भमा नेपालले आफ्नै मौलिक विकासलाई प्राथमिकता दिनुपर्ने भन्दै बजार र राज्यको सन्तुलित भुमिका भएको मिश्रित प्रकारको विकासको मोडेल आवश्यक रहेको बताउनु भयो ।
उहाँले वैचारिक, भूराजनीतिक, आर्थिक समानता कायम गरेर यो गठबन्धन बनाएको पनि दाबी गर्नुभयो । उहाँले अहिलेको गठबन्धनलाई कतिपयले अपवित्र गठबन्धन भन्ने गरेको भन्दै अहिलेको गठबन्धन नै सबैभन्दा पवित्र गठबन्धन भएको दाबी गर्नुभयो ।
