नयाँ दिल्ली । सन् २०१२ मा दिल्लीस्थित एक बसभित्र एक छात्रामाथि भएको सामूहिक बलात्कारका अभियोगीलाई त्यहाँको अदालतले २२ जनवरीका दिन मृत्युदण्डको सजाय सुनाएको छ ।

चिकित्साशास्त्रकी छात्रा ‘निर्भयाको’ सामूहिक बलात्कार बलात्कार अभियोगी ३२ वर्षीय मुकेश सिंह, पवन गुप्ता, विनय शर्मा र अक्षयकुमार सिंहलाई २२ जनवरीको ७ बजे बिहान तिहाड जेलमा सामूहिक रूपमा मृत्युदण्ड दिन पटियाला हाउस अदालतले मंगलबार आदेश दिएको हो । उनीहरूलाई झुन्ड्याएर मृत्युदण्ड दिन सो जेलमा एक महिनादेखि जेल अधिकारीहरूले तयारी गर्दै आएका छन् ।

‘फैसलाले न्यायपालिकामाथि मानिसको भरोसा जाग्नेछ र महिलालाई शक्ति दिनेछ,’ पीडित युवती ‘निर्भया’ की आमाले भनिन् ।

निर्भया बलात्कार प्रकरणलाई लिएर सिंगो दक्षिण एसिया नै तरंगित बनेको थियो र सरकार बलात्कारीलाई मृत्युदण्ड दिने कानुन बनाउन बाध्य भएको थियो । सरकारले न् २०१३ मा बलात्कार अभियोगीलाई मृत्यदण्डको सजायको व्यवस्था गरेको थियो । उनीहरूलाई अलग–अलग जेलमा एकान्तमा राखिनेछ ।

सजाय पाउनुअघि एकपटक परिवारका सदस्यसँग भेट गर्न पाउनेछन् । चारैजनालाई एकैपटक झुन्ड्याइनेछ । गत महिना मृत्युदण्डको फैसला पुनर्विचार गर्न माग गर्दै अभियोगीमध्येका एक अक्षय कुमारले दिएको उजुरीलाई सर्वोच्च अदालतले अस्वीकार गरेको थियो ।

सन् २०१२ को त्यो घटना यस्तो थियो

सन् २०१२ को डिसेम्बर १२ मा राति नौ बजेपछि एकजना महिला र उनका केटा साथी बस चढेका थिए। त्यो बसका चालक र अन्य पाँच पुरुषले ती महिलालाई सामूहिक बलात्कार गरे र उनका केटा साथीलाई नराम्ररी कुटपिट गरे।

नग्न र रक्ताम्य अवस्थामा उक्त जोडीलाई बाटोको छेउमा फालियो। बाटो हिँडिरहेका केही मानिसले उनीहरूलाई देखेपछि अस्पताल पुर्‍याए र प्रहरीलाई खबर गरे।

महिलाको पन्ध्र दिनपछि मृत्यु भयो र उनका केटा साथी भने जिन्दगीभर डर दिने सम्झनासहित बाँच्न सफल भए। उक्त घटनाको बर्बरताले भारतलाई स्तब्ध तुल्यायो र भारतीय प्रेसले ती महिलालाई ‘निर्भया’को रुपमा चित्रण गर्‍यो।