राष्ट्रिय जनमोर्चा र रक्तिम सांस्कृतिक अभियानका काठमाडौं जिल्ला समितिले संयुक्तरुपमा सञ्चालन गरिरहेको जाली नक्सा खारेजीको छैठौं संस्करण मंगलबार चाबहिलमा सम्पन्न भएको छ । भारतले नेपालको कालापानी लिपुलेक र लिम्पियाधुरा लगायतको भूभाग समेटेर जाली नक्सा सार्वजनिक गरेपछि त्यसविरुद्ध राजमो र रक्तिमले लगातार विरोध गर्दै आएका छन् ।
मंगलबार चाबहिलमा आयोजित सभामा बोल्दै राष्ट्रिय जनमोर्चाका नेता आनन्द शर्माले भारतले गरेको सीमा अतिक्रमणलाई अन्तर्राष्ट्रियकरण गर्न सरकारले खुट्टा कमाउन नहुने बताउनुभयो । उहाँले सीमा अतिक्रमण र जाली नक्सा खारेजीका लागि संयुक्त राष्ट्रसंघमा उठाउनुपर्ने आवश्यकतामा जोड दिनुभयो ।
यस्तै, नेता शर्माले सरकारले अमेरिकी सहयोग मिलेनियम च्यालेञ्ज कर्पोरेशन (एमसीसी) संसदबाट पाररित गराउन खोजेकोप्रति आपत्ति प्रकट गर्दै त्यसलाई संसदले अस्विकार गर्ने बताउनुभयो ।
‘हाम्रो संसदले इरानको अहिलेको घटनाबाट पाठ सिकेर अमेरिकी साम्राज्यवादी सर्तसहित आएको एमसीसी अस्विकार गरोस्’ नेता शर्माले भन्नुभयो, ‘अमेरिकाले दिने केही करोड वा अर्ब रुपैयाँसँगै अमेरिकी साम्राज्यवासमेत नेपालमा घुस्न खोज्दैछ । इण्डो प्यासिफिक रणनीति अन्तर्गतको एमसीसी नेपालमा छिर्यो भने जसरी इरानी कमाण्डरको हत्यापछि इराकबाट अमेरिकी सेना फिर्ता गर्न दिएको अल्टिमेटम अमेरिकाले अटेर गरेको छ, नेपालमा पनि त्यही दोहोरिन सक्छ ।’
गतसाता अमेरिकी राष्ट्रपति डोनाल्ड ट्रम्पको आदेशमा इरानका सबैभन्दा शक्तिशालीमध्ये जर्नेल कासिम सुलेमानी इराकमा मारिएपछि इराकले आफ्नो देशबाट अमेरिकी सेना फिर्ता लैजान आदेश दिएको थियो तर अमेरिकाले आफ्ना सेना फिर्ता लैजाने अवस्था आए इराकमाथि नाकाबन्दी लगायउने चेतावनी दिएको छ ।
कार्यक्रममा नेकपा (मसाल) ३ नं प्रदेशका प्रवक्ता समीर सिंहले नेपालबाट उत्तर कोरियाली नागरिक र त्यहाँकाे लगानी फिर्ता गरेर सरकारले अमेरिकी साम्राज्यवादको सेवा गरेको आरोप लगाउनुभयो । उहाँले सरकारका गलत क्रियाकलापका कारण देश भारतीय र अमेरिकी साम्राज्यवादीहरुकाे क्रिडास्थल बन्ने खतरा रहेकाे बताउनुभयाे ।
कार्यक्रमलाई अखिल (छैठौं) का अध्यक्ष विमल पोखरेल, राजमो कर्णालीका अध्यक्ष भरत शाही लगायतका नेताहरुले पनि सम्बोधन गर्नुभएको थियो । राजमो काठमाडौं जिल्ला सदस्य प्रेम मोक्तानको अध्यक्षता र नेकपा (मसाल) जिल्ला प्रवक्ता जगत रेग्मीको सञ्चालनमा अघि बढेको कार्यक्रममा रक्तिमका कलाकारहरुले विभिन्न जोशीला गीत र नृत्य प्रस्तुत गरेका थिए ।
