महेन्द्रनगर । राष्ट्रिय जनमोर्चा कञ्चनपुरले निर्वाचन परिचालन समिति गठन गरेको छ । आइतबार बसेको जिल्ला समितिको बैठकले अगामी मंसिर ४ गते हुन गैरहेको प्रतिनिधि सभा र प्रदेश सभा निर्वाचन तयारीका लागि राजमोले परिचालन समिति बनाएको हो ।

बैठकले जिल्ला अध्यक्ष रामबहादुर कार्कीको संयोजकत्वमा ११ सदस्यीय निर्वाचन परिचालन समिति गठन गरेको छ । यस्तै, प्रदेश सचिव राजाराम चौधरीको संयोजकत्वमा ७ सदस्यीय आर्थिक समिति र जिल्ला सचिव लालबहादुर कुँवरको संयोजकत्वमा १५१ सदस्यीय प्रचार समिति गठन गरेको छ ।

बैठकमा राजमो केन्द्रीय सदस्य नन्दराज भट्ट, नेता हरिकृष्ण पाण्डेले निर्वाचन र समसामयिक अवस्थाको बारेमा प्रशिक्षण दिनुभएको थियो । त्यस्तै, निर्वाचन सम्बन्धी कार्यक्रम अध्यक्ष कार्कीले प्रस्तुत गर्नुभएको थियो ।

कञ्चनपुरमा राजमोको प्रत्यक्ष उम्मेदवार छैनन् । गठबन्धनमा भएको सहमति अनुसार राजमोले उम्मेदवारी नदिएको हो ।

समानुपातिकतर्फ पार्टीलाई मतदान गर्न राजमो कञ्चनपुरले जिल्लाभरका मतदातासँग आह्वान गरेको छ ।