काठमाडौं । राष्ट्रिय जनमोर्चाले प्रदेश सभातर्फ अर्घाखाँची जिल्लाको क्षेत्र क बाहेक प्रदेशसभातर्फको उम्मेदवारी फिर्ता लिएको छ ।
अध्यक्ष चित्रबहादुर केसीले शुक्रबार विज्ञप्ति प्रकाशित गरी पाँचदलीय गठबन्धनमा भएको सहमतिअनुसार पार्टीले उम्मेदवारी फिर्ता लिने निर्णय गरेको स्पष्ट पार्नुभएको छ ।
राजमोले प्रदेश सभामा अर्घाखाँचीको क्षेत्र क मा सागर केसीको उम्मेदवारी दिएको छ । केसी पाँचदलीय गठबन्धनको साझा उम्मेदवार हुनुहुन्छ । यसबाहेक गठबन्धनका तर्फबाट प्रतिनिधि सभातर्फ बागलुङ १ मा अध्यक्ष चित्रबहादुर केसी र प्युठानमा उपाध्यक्ष दुर्गा पौडेलको उम्मेदवारी कायम छ ।
सो विज्ञप्तिमा ति क्षेत्रबाहेक उम्मेदवारी निस्क्रिय पारेर गठबन्धनका उम्मेदवारलाई सहयोग गर्न निर्देशन दिइएको छ ।
यस्तो छ वक्तव्य
‘आगामी मंसीर ४ गते हुने प्रतिनिधि सभा र प्रदेशसभा सदस्य निर्वाचनमा गठबन्धनका दलहरु बीच चुनावी तालमेल भएको छ । त्यसरी तालमेलको लागि सहमति भएका कतिपय निर्वाचन क्षेत्रहरुमा गठबन्धन दलहरुका दोहोरो उम्मेदवारी वा बागी उम्मेदवारी परेकोमा तिनलाई फिर्ता गर्ने र समयको कारण फिर्ता गर्न नभ्याएका स्थानका उम्मेदवारहरुका उम्मेदवारीहरुलाई निष्कृय पार्ने (छाड्ने) सहमति भएको छ ।
त्यस अनुसार राष्ट्रिय जनमोर्चाका काठमाडौँ ९ (ख), गुल्मी १ (क), दाङ १ (क) र सुर्खेत १ (ख) का प्रदेशसभा सदस्यका उम्मेदवारीहरु निष्कृय पार्ने (छाड्ने) र गठबन्धन दलका उम्मेदवारहरुलाई सहयोग गर्न निर्देशन गरिन्छ ।
२०६२–६३ सालको संयुक्त जआन्दोलनबाट प्राप्त उपलब्धिहरु गणतन्त्र, राष्ट्रियता तथा धर्म निरपेक्षतामाथि गम्भीर खतरा उत्पन्न भएको छ । त्यो स्थितिमा देश प्रतिगमनतिर जाने, राजतन्त्र वा कुनै प्रकारको अधिनायकवादी व्यवस्था आउने खतरा छ ।
त्यसप्रकारको पृष्ठभूमिमा नै प्रतिगमन विरोधी ५ दलीय गठबन्धनको निर्माण भएको हो । प्रतिगमनको खतरा अहिले पनि विद्यमान भएकाले त्यसका विरुद्ध गठबन्धनलाई बलियो र सशक्त बनाउनु पर्ने राष्ट्रिय आवश्यकता छ । आगामी मंसिर ४ गते हुने निर्वाचन प्रतिगमनलाई परास्त गर्ने महत्वपूर्ण कडी हुनेछ ।
त्यसका लागि सम्पूर्ण देशभक्त, लोकतान्त्रिक शक्ति तथा जनसमुदायहरुले आगामी निर्वाचनमा गठबन्धनका उमेदवारहरुलाई विजयी बनाउनु पर्दछ । त्यसको लागि हामीले सबै देशभक्त, लोकतान्त्रिक जनसमुदायहरुलाई हार्दिक अपील गर्दछौँ ।’
२०७९ असोज २८ गते
चित्रबहादुर केसी
अध्यक्ष
