बागलुङ बजार । पाँच दिनदेखिको निरन्तर वर्षाका कारण बागलुङ निसीखोला गाउँपालिकाका दुईओटा जलबिद्युत् आयोजना अवरुद्ध भएका छन् ।
निसीखोला–४ र ५ मा रहेका बिद्युत् आयोजनामा बाढी पस्दा र पहिराले नहर बगाउँदा आयोजना अवरुद्ध भएको हो ।
निसीखोला पहिलो लघुजलबिद्युत् आयोजनाको बिद्युत्गृहमा बाढी बसेर अवरुद्ध बनेको स्थानीय मनबहादुर घर्तीमगरले जानकारी दिनुभयो ।
निसीखोला दोस्रो लघुजलबिद्युत् आयोजनाको भने नहर भत्किएपछि अवरुद्ध भएको आयोजनाका व्यवस्थापक रामप्रसाद चालिसेले जानकारी दिनुभयो । उहाँले वर्षाको कारण बिद्युत् सञ्चालनमा ल्याउन समस्या भएको बताउनुभयो । पहिराले नहर जोखिममा पर्दाबित्तिकै बनाउन सुरु गरे पनि अझै पाँच दिन बिद्युत् सञ्चालन गर्न नसकिने बताउनुभयो ।
‘पहिराले नहर बगाउन थालेदेखि नै काम सुरु गरेका हौँ तर वर्षाले गर्दा काम गर्न दिएन, तैपनि बिद्युत् छिटो सञ्चालनमा ल्याउनका लागि कामदारहरू खटाइराखेका छौँ’ उहाँले भन्नुभयो– ‘बिद्युत् सञ्चालनमा आउन अझै पाँच दिन लाग्न सक्छ । कुनापट्टि बाट नयाँ नहर बनाउनुपर्ने भएको छ । त्यसले गर्दा केही दिन ढिला हुने देखिन्छ ।’
निसीखोला पहिलो लघुजलबिद्युत् आयोजनाको भने बिद्युत् गृहभित्र बाढीसहित पसेको लेदो सफा गर्ने काम भइरहेको आयोजनाले जनाएको छ ।
दुईओटा बिद्युत् आयोजना अवरुद्ध हुँदा यहाँका दर्जनौँ साना तथा घरेलु उद्योग ठप्प भएका छन् । बिद्युत् अवरुद्ध भएपछि बडादसैँसमेत खल्लो भएको स्थानीयको भनाइ छ । बिद्युत् अवरुद्ध हुँदा निसीखोला गाउँपालिका–३, ४ र ५ का करिब १० हजार नागरिक अन्धकारमा बस्न बाध्य भएको व्यवस्थापक चालिसेले जानकारी दिनुभयो ।
