काठमाडौँ । गत स्थानीय तहको निर्वाचनमा निर्वाचन खर्चको विवरण नबुझाएका उम्मेदवारले त्यसबापत् बुझाउनुपर्ने जरिवाना जिल्लामै बुझाउन सक्ने भएका छन् ।

निर्वाचन आयोगले २०७९ असोज २२ गते सूचना जारी गर्दै स्थानीय तहको निर्वाचनमा उम्मेदवार भई कानुनबमोजिम निर्वाचन खर्चको विवरण नबुझाउने उम्मेदवारलाई जरिवानाबापत्को रकम दाखिला गर्न सो व्यवस्था गरेको हो ।

सो कार्यको सहजताका लागि आयोगको काठमाडौँ बहादुर भवनस्थित कार्यालय, सातओटै प्रदेश कार्यालय र ७७ ओटै जिल्ला निर्वाचन कार्यालयमा समेत रकम बुझाउन सक्ने व्यवस्था गरेको छ ।

आयोगले कानुनबमोजिमको जरिवाना रकम निर्वाचन आयोगको कार्यालय कोड र सम्बन्धित राजस्व शीर्षकमा दाखिला भएको भौचरसहितको निवेदन प्रदेश/जिल्ला निर्वाचन कार्यालय वा आयोगमा पेस गर्न यसअघि निर्देशन दिएको थियो ।