काठमाडौँ । आगामी मङ्सिर ४ गतेको हुने प्रतिनिधि सभा तथा प्रदेशसभा निर्वाचनका लागि स्वदेशी र विदेशी गरी करिब २० हजार पर्यवेक्षक परिचालित हुने भएका छन् ।
निर्वाचन आयोगले पर्यवेक्षणका लागि गरेको आह्वानानुसार आवेदन दिई स्वीकृति प्राप्तमध्ये ४३ ओटा स्वदेशी संस्थाले पेस गरेका आँकडा अनुमान गर्दा करिब २० हजार पर्यवेक्षक हुने आयोगका सहप्रवक्ता कमल भट्टराईले जानकारी दिनुभयो ।
विदेशीतर्फ हालसम्म दुईओटा संस्थाले पर्यवेक्षणका लागि अनुमति पाएका छन् । उहाँले केही संस्थाहरू पर्यवेक्षकलाई सहरी र सुविधासम्पन्न क्षेत्रमा मात्र नभई दूरदराजका मतदान स्थलमा पनि पर्यवेक्षण गराउने गरी काम भइरहेको उहाँको भनाइ थियो ।
आयोगले भारत, बङ्गलादेश, भुटान, माल्दिभ्स, पाकिस्तान र श्रीलङ्काका प्रमुख निर्वाचन आयुक्त तथा मतदानको दिन अवलोकनका लागि नेपालस्थित विदेशी कूटनीतिक नियोगका प्रमुखलाई मतदानको अवलोकनका लागि आग्रह गरेको छ ।
