काठमाडौँ । काठमाडौँ महानगरपालिकाले बडादसैँ अवधिभर निःशुल्क एम्बुलेन्स सेवा प्रदान गर्ने भएको छ ।

डेङ्गु महामारीकै रूपमा फैलिरहेको भन्दै दसैँ अवधिभर काठमाडौँ महानगरपालिकाले आफ्ना नागरिकका लागि स्वास्थ्य सेवा उपलब्ध गराउने घोषणा गरेको हो ।

महानगरका मेयर बालेन साहका अनुसार डेङ्गुबारे जानकारी लिने र बिरामीलाई निःशुल्क एम्बुलेन्स सेवा उपलब्ध गराइने भएको छ ।

उनका अनुसार डेङ्गुबारे जानकारी लिनका लागि महानगरपालिकाले हटलाइन सेवा दिने छ । त्यसका लागि ११८० मा फोन गरेर सेवा लिन सकिने छ । एम्बुलेन्स सेवाका लागि १०२ मा सम्पर्क गर्न सकिने मेयर साहले जानकारी गराए ।

त्यसका साथै बडादसैँ अवधिभर महानगरभित्र ५५८ जना स्वयम्सेवक खटाइने भएको छ । उनीहरूले यस अवधिभर सिटामोल र जीवनजल वितरण गर्ने छन् ।