काठमाडौं । पाँचदलीय गठबन्धनले प्रतिनिधि सभाका एक सय सिटको बाँडफाँट गरेको छ । मंगलबार साँझ र बुधबार बिहान बसेको बैठकले एक सय सिटको बाँडफाँट गरेको र छलफल जारी रहेको एक नेताले जानकारी दिए ।
गठबन्धन शीर्ष नेतासहित कार्यदलको बैठक आज (बुधबार) पनि जारी छ ।
‘१०० सिटमा कुरा मिलेको छ । बाँकी सिट पनि टुंग्याउँदै जानेगरी छलफल भइरहेको छ’ ती नेताले भने, ‘दुई वा तीन पार्टीको दाबी रहेको ठाउँमा दुई पक्ष, तीन पक्ष बसेर पनि टुंग्याउने गरी गठबन्धनमा छलफल भइरहेको छ ।’
उनका अनुसार सकेसम्म सबै सिटमा गठबन्धन हुने छ । यदी केही सिट बाँकी रहे त्यसमा मैत्रीपूर्ण प्रतिस्पर्धा गर्नेगरी छलफल भइरहेको छ ।
‘एक भन्दा बढी दलले दाबी गरेका कारण केही सिट बाँडफाँट गर्न समस्या भयो भनेपनि ती सिटमा मैत्रीपूर्ण प्रतिस्पर्धा हुनेछ’ उनले भने, ‘तर, गठबन्धन बाहिरका दलले जित्ने अवस्थामा भने तालमेल गर्नुको विकल्प रहँदैन ।’
प्रधानमन्त्री निवास बालुवाटारमा मंगलबार साँझ बसेको गठबन्धनको बैठकले दुवै निर्वाचनको सिट बाँडफाँडको विषय निष्कर्ष नजिक पुगेको सञ्चार तथा सूचना प्रविधिमन्त्री एवम् नेपाली कांग्रेसका नेता ज्ञानेन्द्रबहादुर कार्कीले बताउनुभयो ।
प्रतिनिधिसभाका १६५ सिट मध्ये करिव ८० प्रतिशत टुंगो लागेको उहाँको भनाई थियो। चाँडै सहमती गरेर आफूहरुले सञ्चार माध्याममार्फत् देशलाई जानकारी गराउने कार्कीले बताउनुभयो ।
मन्त्री कार्कीले भन्नुभयो, ‘अब हामी निष्कर्षको नजिकमा पुगेका छौं। र, त्यो निष्कर्षका निमित्त छलफल भइराखेको छ। बैठक जारी छ। करिब करिब १६५ सिटमा ८० प्रतिशत हामी सहमतिको नजिक पुगेका छौं। र, त्यो चाँडै नै सहमति गरेर यहाँहरुमार्फत् हामी सार्वजनिक गर्छौं ।’
