बसन्त खड्का अर्घाखाँची ।
नेकपा (मसाल) का महामन्त्री मोहनविक्रम सिंहले एमाले राजावादी शक्तिसँग मिलेर व्यवस्था खतम पार्न लागिपरेको आरोप लगाउनु भएको छ ।

प्रगतिशील पत्रकार संघले आज अर्घाखाँचीमा गरेको पत्रकार सम्मेलनमा सिंहले कुन पार्टीको सरकार बन्छ भन्ने कुरा गौण रहेको र आफूहरुको मुख्य उदेश्य प्रतिगमन पराजित गर्नु रहेको स्पष्ट पार्नुभयो ।

देश प्रतिगमनको खतरामा रहेको भन्दै महामन्त्री सिंहले कथम कदाचित प्रतिमागीहरु विजय भए भने व्यवस्थामाथि नै आक्रमण हुने चिन्ता व्यक्त गर्नुभयो । देशमा गणतन्त्र स्थापना भएदेखि नै राजावादी शक्तिहरुको चलखेल बढ्दै गएको तर त्यो चलखेल ओलीको सहयोगमा अहिले झन् सक्रिय भएको भन्दै सिंहले २०१७ र ५९ सालको भन्दा खतरा अहिले भएको बताउनुभयो ।

‘उतिबेला राजा एक्लै प्रतिगमन गर्थे भने अहिले देशी विदेशी सबै एकजुट भएर प्रतिगमन गर्न उद्दत हुँदै छन् । त्यसको नेतृत्व एमालेले गरिरहेको छ’ सिंहले भन्नुभयो ।

सिंहले नेकपा एमाले र ओली धर्म निरपेक्षताको बाटो छोडेर हिन्दु राष्ट्र र राजतन्त्रको बाटोमा लागेको आरोप पनि लगाउनु भयो ।

गठबन्धनको औचित्य प्रस्ट पार्दै सिंहले जबजब देशमा प्रतिगमन हुन्छ तब सबै मिलेर प्रतिगमन परास्त गरेको नेपालको इतिहास भएको भन्दै अहिले त्यही अनुरुप एकजुट हुन परेको बताउनु भयो । पाँचदलीय गठबन्धन समाप्त गर्न देशी विदेशी शक्तिसहित एमाले लागिपरेको पनि उहाँको भनाई छ ।

स्थानीय चुनावमा गठबन्धनको तालमेल नीति पूर्ण सफल हुन नसकेको तर अहिले त्यो अवस्था आउन दिन नहुने उहाँले बताउनुभयो । गठबन्धन बिच सिट भागबण्डा मिल्न नसक्नुमा हैसियत भन्दा बढी माग दाबी भएको उहाँको भनाइ छ । तर राष्ट्रिय जनामोर्चाले यथार्थ धरातलमा रहेर सिट माग गरेको सिंहको भनाइ थियो ।

कुनै कारणबश तालमेल भत्किएमा एमालेको पोल्टामा सत्ता गएमा त्यो देश र जनताको लागि खतरा हुने र देश बर्वादीतर्फ धकेलिने पनि सिंहको दावी रहेको थियो ।

पत्रकारहरुको जिज्ञासाको जवाफ दिँदै नेता सिंहले एमसीसी र नागरिकता विधेयकको आफूहरुले विरोध गरेको स्पष्ट पार्नुभयो । आफूहरुले संसदमा मात्र नभएर संसद बाहिर पनि सशक्त रुपमा विरोध जनाएको स्मरण गराउनुभयो । नागरिकता विधेयक र एमसीसीको विषयमा एमालेको भित्रैदेखि समर्थन रहेको तर बाहिर जनमत बटुल्न मौन भएको आरोप पनि सिंहले लगाउनुभयो ।

परिवारवादको आरोपबारे सिंहले कति पटक चुनाव उठ्ने र संसद भवन जानेभन्ने बारेमा संसारमा कहिँ नियम नभएको स्पष्ट पार्दै पार्टीको नीति नियम र कार्यकर्ताले पार्टीमा गरेको योगदानमा भर पर्ने उहाँले बताउनुभयो ।

राष्ट्रिय जनमोर्चाका नेता कार्यकर्ताहरुलाई प्रशिक्षण दिन सिंह अर्घाखाँची आउनुभएको हो । उहाँले असोज ३ र ४ गते कार्यकर्ताहरुलाई प्रशिक्षण दिनुभएको थियो ।