बुटवल । राष्ट्रिय जनमोर्चाका अध्यक्ष चित्रबहादुर केसीले भूमिहीनलाई जमिन दिलाउन अखिल नेपाल किसान महासङ्घ (अप्फा) को तर्फबाट भूमि आयोगमा रहनुभएका प्रतिनिधिले सम्झौताहीन भूमिका खेल्नुपर्ने आवश्यकतामा जोड दिनुभएको छ ।
अखिल नेपाल किसान महासङ्घ (अप्फा) को आयोजनामा २०७९ भदौ २९ गते रुपन्देहीको बुटवलस्थित राजमो लुम्बिनीको कार्यालय भवनमा सम्पन्न उक्त कार्यक्रममा प्रशिक्षण दिँदै उहाँले यस्तो अभिव्यक्ति दिनुभएको हो ।
अध्यक्ष केसीले भूमिहीन नेपाली जनताको जमिन प्राप्तिसम्बन्धी आधारभूत समस्या नयाँ जनवादी क्रान्तिपछि मात्रै समाधान हुने भए पनि त्यसअघि पनि त्यसलाई प्राप्त गर्न प्रयास गरिरहनुपर्ने आवश्यकतामा जोड दिनुभयो ।
‘तपाईंहरूलाई थाहै छ, भूमिहीन नेपालीका आधारभूत समस्या नयाँ जनवादी क्रान्तिपछि मात्रै समाधान हुने छन्’ उहाँले अगाडि भन्नुभयो– ‘तर त्यसभन्दा अगाडि पनि भूमिहीनलाई जमिन दिलाउन तपाईंहरूले सम्झौताहीन भूमिका खेल्नुपर्दछ ।’
संविधानले नै भूमिहीनलाई जमिन दिने अवधारणा राखेकाले एकपटकका लागि भूमि दिलाउन किसान महासङ्घका प्रतिनिधिको उल्लेखनीय भूमिका हुनुपर्नेमा उहाँको जोड थियो ।
‘जमिन भन्दाबित्तिकै र्याल काढ्नेहरू हाम्रो देशमा जति पनि छन् तर ती सबैलाई जमिन दिन सकिन्न । हाम्रो जोड वास्तविक भूमिहीनलाई जमिन दिलाउनेतर्फ हुनुपर्दछ’ उहाँको भनाइ थियो ।
देशको समसामयिक परिस्थितिबारे धारणा राख्दै उहाँले ओलीको नेतृत्वमा नेकपा (एमाले) ले गणतन्त्र र धर्म निरपेक्षता समाप्त गर्न खोजेकाले त्यसका विरुद्ध पाँचदलीय सहकार्य अहिले पनि आवश्यक रहेको बताउनुभयो ।
‘ओलीले गणतन्त्र र धर्म निरपेक्षता समाप्त गरेर राजतन्त्र र हिन्दु राष्ट्र बनाउन चाहन्छन्’ उहाँले भन्नुभयो– ‘त्यही भएर हामी पाँच दल मिलेर गत जनआन्दोलन र संविधानमा लेखिएको राजनीतिक उपलब्धिको रक्षा गर्न चुनावी तालमेल गरेका हौँ ।’
अध्यक्ष केसीले पाँच दल आपसमै लडेर चुनावी तालमेल नहुने हो भने प्रतिगामी शक्तिहरूको बोलबाला हुने भन्दै अगाडि भन्नुभयो– ‘यदि पाँच दल एक्लाएक्लै लडे भने ओली बहुमत आउने छन् । उनी बहुमतमा आए भने संविधान संशोधन गरे देशमा गणतन्त्रको सट्टा राजतन्त्र र धर्म निरपेक्षताको सट्टा हिन्दु राष्ट्र कायम गर्ने छन् ।’
उहाँले देशका सामु जनआन्दोलनका उपलब्धि गुम्न थालेकाले त्यसका विरुद्ध सङ्घर्ष गर्न तयार रहन अपिल गर्नुभयो ।
संसद्मा जस्तै उदाहरणीय बनौँ : सिंह
कार्यक्रममा प्रशिक्षण दिँदै नेकपा (मसाल) काम महामन्त्री मोहनविक्रम सिंहले संसद्मा राष्ट्रिय जनमोर्चाले उदाहरणीय भूमिका खेले जस्तै किसान महासङ्घका प्रतिनिधिहरूले पनि काम गर्न आह्वान गर्नुभयो ।
‘राष्ट्रिय जनमोर्चाका सांसदहरूले संसदमा निष्कलङ्क प्रकारले राम्रो उदाहरणीय भूमिका प्रस्तुत गरेका छन्’ उहाँले अगाडि भन्नुभयो– ‘हामी आशा गर्दछौँ, किसान महासङ्घका प्रतिनिधिहरूले पनि भूमि आयोगमा त्यस्तै उदाहरणीय काम गर्नुहुने छ ।’
उहाँले यही व्यवस्थाभित्र पनि जुन मात्रामा भूमिहीनलाई जमिन दिलाउन सम्भव हुन्छ, त्यस्तो गर्नु सही काम हुने धारणा पनि व्यक्त गर्नुभयो ।
‘यही व्यवस्थाभित्र पनि भूमि आयोगको तर्फबाट वास्तविक भूमिहीनलाई जमिन दिलाउन सकिन्छ भने त्यो असाध्यै राम्रो काम हो’ उहाँको भनाइ थियो ।
महामन्त्री सिंहले भूमिहीनलाई जमिन दिलाउन भूमि आयोगभित्रका किसान महासङ्घका प्रतिनिधिले सक्रियतापूर्वक र सम्झौताहीन प्रकार काम गर्नुपर्ने बताउनुभयो ।
किसान महासङ्घ (अप्फा) का अध्यक्ष तथा राष्ट्रिय भूमि आयोगका केन्द्रीय सदस्य भैरवराज रेग्मीको अध्यक्षतामा सम्पन्न उक्त कार्यक्रममा सर्वप्रथम आयोगका जिल्ला अध्यक्ष, विज्ञ सदस्य तथा सदस्यहरूबाट आआफ्नो जिल्लाको कार्यप्रगति रिपोर्ट प्रस्तुत गरिएको थियो ।
कार्यक्रममा तात्कालिक राजनैतिक अवस्था, संयुक्तमोर्चा र कार्यगत एकता, भूमि आयोगको काम, कर्तव्य र अधिकारलगायतका विषयमा प्रशिक्षण दिइएको भयो ।
कार्यक्रमको सञ्चालन राष्ट्रिय भूमि आयोग रुपन्देहीका विज्ञ सदस्य बद्रे आलमले गर्नुभएको थियो ।
