काठमाडौं । पछिल्लो समय नेपालमा अमेरिकी तथा चिनियाँ नेताहरुको भ्रमण बाक्लिएको छ । एकपछि अर्को गर्दै दुवै देशबाट उच्च तहको भ्रमण हुने क्रम जारी छ ।
हालै दक्षिण तथा मध्य एसियाली मामिला ब्यूरो हेर्ने कार्यवाहक प्रमुख उपसहायक अमेरिकी विदेशमन्त्री एलिजाबेथ होर्स्टले नेपाल भ्रमण गरेकी छन् ।
उनको भ्रमण जलवायु परिवर्तनका क्षेत्रमा नेपाल र अमेरिकाबीचको साझेदारीमा केन्द्रित रहेको अमेरिकी दूतावासले जनाएको छ।
होर्स्ट नेपालमा पहिलो पटक आयोजना हुन लागेको क्लाइमेट एक्सन च्याम्पियन्स नेटवर्क सम्मेलनमा सहभागी हुन नेपाल आएकी हुन् ।
चिनियाँ जनकंग्रेस अध्यक्ष ली आउँदै
चिनियाँ राष्ट्रिय जनकंग्रेसका अध्यक्ष ली चान्सु आगामी सोमबार (२७ भदौ मा) नेपाल भ्रमणमा आउँदै छन् । चिनियाँ कम्युनिष्ट पार्टीको तेस्रो बरियताका नेता ली झन्डै एक सयजनाको जम्बो भ्रमण दल लिएर काठमाडौं उत्रन लागेका हुन् ।
उनी राष्ट्रपति सी चिनफिङ र प्रधानमन्त्री ली खछ्याङपछिको तेश्रो वरीयतामा छन्।
भ्रमण दलमा चिनियाँ कम्युनिस्ट पार्टी मन्त्रीस्तरका ६ जना, राज्यमन्त्रीस्तरका २ जना नेता र विदेश मन्त्रालयका अधिकारीलगायत रहने स्रोतले जनाएको छ।
प्रतिनिधि सभाका सभामुख अग्नि सापकोटाको मैत्रीपूर्ण निमन्त्रणामा चीनको राष्ट्रिय जनकंग्रेसका स्थायी समिति अध्यक्ष ली नेपाल आउन लागेका हुन् । राष्ट्रिय जन कंग्रेस चीनको व्यवस्थापिका हो । जसले चीनको राष्ट्रिय नीति बनाउने गर्छ ।
चिनियाँ प्रभावशाली नेता ली चार दिनका लागि नेपाल आउन लागेका हुन् ।
नेपाल भ्रमणका क्रममा ली ले राष्ट्रपति विद्यादेवी भण्डारी, सभामुख, राष्ट्रिय सभाका अध्यक्ष, नेकपा एमाले र माओवादी केन्द्रका अध्यक्षलगायत नेतासँग भेटवार्ता गर्ने कार्यक्रम छ ।
