काठमाडौं । नेपाल कम्युनिष्ट पार्टी (मसाल) का प्रवक्ता रामप्रकाश पुरीले आन्दोलनका क्रममा कैयौं ब्यक्तिहरु पतन भएपनि क्रान्तिकारी आन्दोलन अघि बढ्दै जाने बताउनुभएको छ ।

बिहीबार काठमाडौंमा १२७ औं माओ जयन्तीका अवसरमा आयोजित कार्यक्रममा सम्बोधन गर्दै प्रवक्ता पुरीले क्रान्तिकारी पार्टीको नेतृत्वमा नै जनताको आन्दोलन अगाडि बढ्ने र जनताको नेतृत्व नेकपा (मसाल) ले नै गर्नसक्ने स्पष्ट पार्नुभएको छ ।

अहिले पनि माओको योगदान उत्तिकै रहेको प्रवक्ता पुरीको भनाई थियो । तर, नेपालका नामधारी कम्युनिस्ट पार्टीले माओको नाम सम्म लिन छोडेको उहाँले बताउनुभयो । ‘पूर्व माओवादी अब माओको नाम लिने पक्षमा छैन र अब तिनीहरु माओवाद वा माओविचारधाराबाट धेरै टाढा पुगिसकेका छन् ।’ प्रवक्ता पुरीले भन्नुभयो, ‘तर नेपालको क्रान्तिकारी आन्दोलनको लागि माओविचारधारा आज पनि उत्तिकै महत्त्वपूर्ण छ । नेकपा (मसाल) ले माओले अबलम्बन गरेको क्रान्तिकारी दिशामा आन्दोलनको नेतृत्व गरिरहनुपर्छ ।’

नेकपा (मसाल) केन्द्रीय समितिको अयोजनामा सम्पन्न कार्यक्रमका  वक्ताहरु राष्ट्रिय जनमोर्चाका महासचिव जनकराज शर्मा,अखिल नेपाल महिला संघकी केन्द्रीय अध्यक्ष तथा पूर्व सांसद मिना पुन,अखिल नेपाल ट्रेड युनियन (अन्टुक)का केन्द्रीय अध्यक्ष नारायण सापकोटा,अखिल नेपाल जनजाति सम्मेलनका केन्द्रीय अध्यक्ष निम बहादुर बुढा,अखिल नेपाल कानुन व्यवसायी संघका केन्द्रीय अध्यक्ष पदम रोका,डा.गोविन्द आचार्य राजमो केन्द्रीय सदस्य घनश्याम न्यौपाने,अखिल (छैठौं)का केन्द्रीय सचिव सुवास जिसी,युगदर्शन साप्ताहीका कार्यकारी सम्पादक तथा प्रगतिशील लेखक संघका केन्द्रीय सचिव प्रकाश थापा मगर र राजमो जिल्ला सहसचिव ऋतु केसीलगायत वक्ताहरुले माओको योगदानबारे चर्चा गर्नुभएको थियो ।

नेकपा (मसाल) ३ नम्बर क्षेत्रका प्रवक्ता समीर सिंह को अध्यक्षता तथा नेकपा (मसाल)का जिल्ला प्रवक्ता जगत रेग्मीको सञ्चालनमा कार्यक्रम सम्पन्न भएको थियो ।