काठमाडौं । भारतले नेपालको आग्रह वेवास्ता गर्दै अग्निपथ योजना अन्तर्गत गोर्खा सैनिकको भारतीय सेनामा भर्र्ती निरन्तर रहने बताएको छ ।
नेपाल सरकारले अग्निपथ योजनाअन्र्तगत नेपाली युवालाई भर्ती नगर्न अनुरोध गरेको थियो तर नेपालले अग्निपथ योजनामा भर्ती नगर्न आग्रह गरेको भोलिपल्ट भारतले भर्तीलाई निरन्तरता दिने बताएको हो ।
भारतीय विदेश मन्त्रालयका प्रवक्ता अरिन्दम बागचीले बिहीबार नयाँ दिल्लीमा आयोजना गरेको नियमित पत्रकार सम्मेलनमा गोर्खा सैनिकहरु भारतीय सेनामा लामो समयअघिदेखि भर्ती हुँदै आएको भन्दै अबका दिनमा पनि त्यो क्रम जारी रहने बताए ।
परराष्ट्रमन्त्री नारायण खड्काले भारतीय राजदूत नवीन श्रीवास्तवलाई बुधबार मन्त्रालयमा डाकेर अग्निपथ योजनाबारे जानकारी मागेका थिए । उनले उक्त योजनामा नेपाली युवालाई जान दिने वा नदिनेबारे राष्ट्रिय सहमति कायम नभएकाले तत्कालका लागि भर्ती प्रक्रिया अघि बढाउन अनुरोध गरेका थिए ।
नेपालको अनुरोध अनुसार बिहीबारदेखि बुटवलमा थाल्ने भनिएको गोर्खा सैनिकको भर्ती प्रक्रिया भने भारतीय पक्षले तत्कालका लागि स्थगित गरेको छ ।
भारत सरकारले घोषणा गरेको उक्त योजना कार्यान्वयन भने भइसकेको छैन । उक्त योजनाअन्तर्गत भारतीय सेनाले अब भर्तीमा सैनिक लिँदा ४ वर्षका लागि मात्र लिनेछ ।
योजनाअनुसार २५ प्रतिशत सैनिकलाई मात्र स्थायी गरिनेछ । योग्यता नपुगेकालाई भारतीय रुपयाँ १० लाख ४० हजार दिएर अवकाश दिइनेछ । अवकाश पाउनेले पेन्सन पाउने छैनन् ।
भारतले खर्च कटौतीअन्तर्गत उक्त योजना अघि सारेको हो । उक्त योजना भारतको आन्तरिक विषय भए पनि त्यसले नेपालीलाई पनि असर पर्नेछ । उक्त योजना ल्याउनुअघि भारत सरकारले नेपाल सरकारलाई सामान्य जानकारीसम्म पनि दिएको छैन ।
गत जुनमा मोदी सरकारले ल्याएको ‘अग्निपथ योजना’ ले भारतीय सेनामा जाने नेपालीलाई असर पर्ने देखिन्छ । हाल भारतीय सेनाको गोर्खा रेजिमेन्ट मातहत बिभिन्न बटालियनमा गरी करिब ३२ हजार नेपाली युवा छन् ।
