काठमाडौं । विभिन्न राजनीतिक दलले आह्वान गरेको नेपाल बन्दको मौका छोपी दाङमा टिपरधनीले आफ्नै टिपरमा आगो लगाएका छन् । रा १ ख १६९४ नम्बरको खालि टिपरमा आगलागी भएको हो ।

टिपर धनी धनेश्वर भण्डारीको निर्देशनमा चालक अरुण चौधरी र सहचालक आकाश चौधरीले उक्त टिपरमा डिजेल खन्याएर आगो लगाएको प्रहरीले जनाएको छ ।

मंगलबार बिहान ५ बजे घोराही उपमहानगरपालिका ३ कुइरेपानीको बबई खोलाको पुल नजिक टिपरमा आगजनी भएको थियो ।

आगजनीपछि टिपर धनी भण्डारीले प्रहरीलाई खबर गरेका थिए । चालक र सहचालकलाई टिपरबाट झारेर बन्दकर्ताले आगजनी गरेर फरार भएको सूचना प्रहरीलाई दिइएको थियो । जानकारी पाउनासाथ प्रहरी चौकी गोग्ली र वडा प्रहरी कार्यालय घोराहीबाट १० जना प्रहरीले दमकल लगेर आगो निभाएका थिए ।

शंका लागि प्रहरीले टिपर धनी, चालक र सहचालकलाई जिल्ला प्रहरी कार्यालय दाङमा लगेर सोधपुछ गरेको थियो । प्रहरीले अनुसन्धानका क्रममा टिपरमा बन्दकर्ताले नभई आफैं आगो लगाएको खुलेको थियो । टिपरधनी धनेश्वर भण्डारीले पुरानो भएकाले टिपरमा आगो लगाएको स्वीकार गरेका छन् । टिपर जलाएर बीमा दाबी गर्ने आफ्नो योजना अनुसार चालक र सहचालकलाई उनले निर्देशन दिएको खुलेको छ ।