काठमाडौँ । छ किसान सङ्गठनले मिटरब्याजी प्रवृत्तिका विरुद्धको आन्दोलनप्रति ऐक्यबद्धता प्रकट गरेका छन् ।

मिटरब्याज तथा ठगी विरुद्ध किसान मजदुर सङ्घर्ष समितिको आयोजनामा गत तीन हप्तादेखि राजधानीमा आन्दोलन चलिरहेका बेला २०७९ भदौ ६ गते माइतीघर मण्डला पुगी उनीहरूले ऐक्यबद्धता प्रकट गरेका हुन् ।

एक्यबद्धता प्रकट गर्न अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी केन्द्र) का अध्यक्ष चित्रबहादुर श्रेष्ठ, अखिल नेपाल किसान महासङ्घका अध्यक्ष बलराम बासकोटा, अखिल नेपाल किसान महासङ्घ (क्रान्तिकारी) का अध्यक्ष सीताराम तामाङ, अखिल नेपाल किसान यूनियनका इन्चार्ज लोकनारायण सुवेदी र अखिल नेपाल प्रगतिशील किसान सङ्घका अध्यक्ष दुर्गाप्रसाद जैसीसहितका नेताहरू माइतीघर मण्डला पुग्नुभएको थियो । सो अवसरमा अप्फा काठमाडौँका अध्यक्ष केबी घलेको पनि उपस्थिति रहेको थियो ।

कार्यक्रममा उहाँहरूले संयुक्त ऐक्यबद्धता पत्र सार्वजनिक गर्नुभएको थियो । यस्तो छ, ऐक्यबद्धता पत्र :

“नेपाली जनताको लामो सङ्घर्षको परिणामस्वरूप आज देश गणतन्त्रको युगमा प्रवेश गरेको छ । तथापि विगतका राणाकालीन र पञ्चायत कालीन समयमा जस्तै गरिब किसान र निर्धा, निमुखा जनतामाथि साहु–महाजन र दलाल पुँजीपतिले गर्ने चर्को शोषण कायमै छ । किसानले एकातिर, लघुवित्तको नाममा वित्तीय पुँजीवादी शोषण चर्को रूपमा खेप्नु परिरहेको छ भने अर्कोतिर, मिटरब्याजीले दिनको सयकडा एक रुपियाँका दरले अर्थात एक लाख रुपियाँका लागि दिनको एक हजार रुपियाँ (वार्षिक ३६५ प्रतिशत) को दरले ब्याज असुल्ने गरी ग्रामीण क्षेत्रको सोझासाझा किसानलाई घरवारविहीन बनाउने शोषणको निकृष्टतम र क्रुरतम रूप निर्बाध कायम रहेको र किसान मारमा परिरहेको देखिएको छ ।

यस स्थितिमा हामी नेकपा (माओवादी केन्द्र), नेकपा (एकीकृत माओवादी), नेकपा (क्रान्तिकारी माओवादी), नेकपा (मसाल), नेपाल कम्युनिस्ट पार्टी र नेकपा (माले) निकट छओटा किसान सङ्गठन मिटरब्याजीबाट किसान र आम जनतामाथि भइरहेको यो अन्याय र शोषण विरुद्धको सङ्घर्षमा हार्दिक ऐक्यबद्धता प्रकट गर्दछौँ । साथै, सबै मिटरब्याजीले थोपरेको अन्यायपूर्ण आर्थिक शोषणको अन्त्य गर्दै किसानलाई ऋणमुक्त गरी सबै मिटरब्याजीलाई कडाभन्दा कडा कारबाही गर्न नेपाल सरकारसमक्ष जोडदार माग गर्दछौँ । किसानको मागलाई तत्काल सम्बोधन गर्न र किसानको शोषण गर्ने यो मिटरब्याजी प्रथाको समूल अन्त्य गर्न हामी जोडदार माग गर्दछौँ । नगरिएमा हामीसमेत सङ्घर्षको मोर्चामा उत्रिने कुरा पनि यसै ऐक्यबद्धता पत्रमार्फत् सार्वजनिक गर्दछौँ ।”

सम्झौतामा छओटै सङ्गठनका अध्यक्षको हस्ताक्षर रहेको थियो ।

गत तीन हप्तादेखि आन्दोलनरत मिटरब्याज तथा ठगी विरुद्ध किसान मजदुर सङ्घर्ष समितिको उक्त आन्दोलनमा अध्यक्ष रामसुरत गुप्ता, उपाध्यक्ष उमाशङ्कर लोनिया, सचिव रामशुभ मुसहरसहितमा १५० भन्दा बढीको सहभागी थियो ।

अखिल नेपाल किसान महासङ्घ (अप्फा) का अध्यक्ष भैरवराज रेग्मीका अनुसार आन्दोलनकारीको मागप्रति सरकार अहिलेसम्म गम्भीर बन्न सकेको छैन ।

युगदर्शनसित उहाँले भन्नुभयो– ‘गृह मन्त्रालयले कर्मचारीलाई मात्रै राखेर देखावटी रूपमा सरकारले एउटा समिति बनाएको छ । यो कुनै गम्भीर पहलकदमी होइन ।’

उहाँले मिटरब्याज प्रवृत्ति विरुद्ध योभन्दा सशक्त आन्दोलनको उठान अहिलेको आवश्यकता रहेको बताउनुभयो ।