काठमाडौं । नेकपा एमालेका उपमहासचिव प्रदीप ज्ञवालीले नागरिकता विधेयकमा जवर्जस्ती नगर्न सत्तापक्षसँग आग्रह गर्नुभएको छ ।
राष्ट्रपतिले पुनर्विचार गर्न संसदमा फिर्ता पठाइदिएको नागरिकता विधेयक संसदमा पुनः पेश भएपनि छलफलमा भाग लिँदै एमाले नेता ज्ञवालीले सांसदहरुको टाउको गणना गरेर जवर्जस्ती पास नगर्न आग्रह गर्नुभएको हो ।
’अहिले हेडकाउन्टमा तपाई (सत्तापक्ष) बढी हुनुहोला । तर, यो विषय हेडकाउन्टले टुंग्याउने विषय हो भन्ने मलाई लाग्दैन’ उहाँले भन्नुभयो, ‘राष्ट्रपतिले दिनुभएको अवसरको सदुपयोग गरौँ । नागरिकता जस्तो संवेदनशील विषयमा जबर्जस्ती होइन, सहमति खोजौँ ।’
नेता ज्ञवालीले सांसदको टाउको गणना गरेर मात्रै नागरिकता विधेयक अघि बढाए समाज विभाजित हुने र त्यसले देशलाई दीर्घकालिन अहित गर्ने चेतावनी पनि दिनुभयो । उहाँले २०३७ सालमा राजा वीरेन्द्रले जनमत संग्रह गरे पञ्चायती व्यवस्थालाई बहुमत सिद्ध गरेको उदाहरण दिँदै बहुमत हुँदैमा गलत चिज नटिक्ने स्पष्ट पार्नुभयो ।
प्रतिनिधिसभा र राष्ट्रिय सभाबाट पारित भएको विवादित नागरिकता विधेयकलाई सभामुख अग्निप्रसाद सापकोटाले गत साउन १५ गते प्रमाणित गरी प्रमाणीकरणका लागि राष्ट्रपतिसमक्ष पठाउनुभएको थियो ।
राष्ट्रपति भण्डारीले साउन २९ गते आइतबार संसद्मै फिर्ता गरिदिनुभएको थियो ।
सत्तारुढ दलहरुको हिजो (भदौ १ गते) बसेको बैठकले सो विधेयकलाई जस्ताको तस्तै संसदमा पेश गर्ने निर्णय गरेर आज सरकारले संसदमा अघि बढाएको हो ।
