काठमाडौँ । काठमाडौं उपत्यकाको फोहोर विसर्जन गर्ने स्थान बञ्चरेडाँडामा बिहीबार पनि स्थानीयले फोहोर फाल्न अवरोध गरेका छन् ।
बुधबार काठमाडौं महानगरपालिका र सरोकारवालाबीच चार बुँदे सहमति भएपनि पक्राउ परेका व्यक्ति रिहा नभएको भन्दै स्थानीयले अवरोधलाई निरन्तरता दिएका हुन्।
बुधबार नुवाकोट, धादिङ र काठमाडौंका प्रमुख जिल्ला अधिकारीहरु, ककनी गाउँपालिका र धुनवेशी नगरपालिकाका जनप्रतिनिधिहरु र प्रहरी अधिकारीसहित बसेर ४ बुँदे सहमति गरेको थियो ।
सो सहमतिमा पक्राउ परेकालाई रिहाइ गर्ने विषय उल्लेख नभएपछि स्थानीयहरूले अवरोध गरेको मानन्धरले बताउनुभयो ।
काठमाडौं महानगरपालिकाका प्रवक्ता नवीन मानन्धरका अनुसार पक्राउ परेकालाई रिहाई गर्न माग गर्दै स्थानीयले बिहानैदेखि अवरोध गरेका हुन्। सरकारले गरेको सहमति कार्यान्वयन नभएको भन्दै स्थानीयहरु आक्रोशित हुँदै आएका छन् ।
काठमाडौं उपत्यकाको फोहोर उठ्न नसक्दा सहर दुर्गन्धित भएको छ।
