कञ्चनपुर । राष्ट्रिय जनमोर्चा, कञ्चनपुरले आगामी मंसिर ४ गते हुने निर्वाचनलाई लक्षित गरी एक महिने संगठनात्मक अभियान तय गरेको छ ।
शुक्लाफाँटा नगरपालिमा–१० को झलारीमा सोमबार बसेको जिल्ला समितिको बैठकले प्रतिनिधि सभा र प्रदेश सभाको निर्वाचनलाई लक्षित गरी विभिन्न पालिकामा भेला तथा बैठकको मिति तय गरेको अध्यक्ष रामबहादुर कार्कीले जानकारी दिनुभयो ।
सांगठनिक अभियान अन्तर्गत ७ स्थानीय तहमा भेला बैठक र प्रशिक्षण तय गरिएको छ ।
जस अनुसार साउन २६ गते सुक्लाफाँटा नगरपालिका, २७ गते भीमदत्त नगरपालिका, दोधराचाँदनी नगरपालिकामा भाद्र ५ गते, लालझाडी गाउँपालिका साउन २७, बेतकोट नगरपालिका साउन २९, बेलौरी नगरपालिका भाद्र ११ र बेलडाँडी गाउँपालिका साउन ३१ गते कार्यक्रम हुने छ ।
बैठकले जिल्ला समितिको रिक्त कोषाध्यक्ष पदमा पृथ्वी केसीलाई जिम्मेवारी दिएको छ ।
त्यस्तै, विभिन्न जनसरोकारका विषयमा बैठकले महत्त्वपूर्ण निर्णयहरु गरेको जनाइएको छ ।
कार्यक्रममा राजमो सुदूरपश्चिम प्रदेश समितिका सचिव राजाराम चौधरी, अखिल नेपाल महिला संघका केन्द्रीय सदस्य रमा नेपाली, अखिल नेपाल किसान महाघंका नेता जनक कुँवर, सुकुम्बासी समस्या समाधान आयोगका जिल्ला सदस्य राजकुमार चौधरी, राजमो नेता जयबहादुर मल्ल लगायतको उपस्थिति रहेको थियो ।
